(Baguia, 28 Agusto 2026) – Centro Nacional Chega!I.P hamutuk ho Autoridade Lokal no komunidade sira iha suku Larisula, Postu Administrativu Baguia, Munisipiu Baucau komemora ona masakre Bo’oloi, Larisula, 20 Agusto 1979 ba dala-47. Komemorasaun ne’e nu’udar aktu rekoñesimentu husi estadu ba martires na’in 13 ne’ebé mak mate, no na’in 2 ne’ebé hetan violasaun direitus umanus husi militar Indonézia.
Komemorasaun ne’e kompleta ho atividade sira hanesan, sertame, konsulta saúde, mini dialogu, aprezentasaun drama, aprezentasaun muzika, aprezentasaun poezia, misa agradesimentu, inagurasaun nomumentu, karii aifunan no sunu lilin iha monumentu masakre Bo’oloi, ne’ebé hetan prezensa husi Eis Jeneral Reformadu, Lere Anan Timur nu’udar mos Asesor Prinsipal Prezidensia Republika, Prezidente Konsellu Kombatente Libertasaun Nasional Munisipiu Baucau, Cornelio Gama “L7” nu’udar mos eis Deputadu iha Parlamentu Nasional, Diretór Jerál Ministeriu Solidariedade Sosial no Inkluzaun, Florêncio Pina Dias Gonzaga, Reprezentante Prezidente Autoridade Munisipiu Baucau, no entidade sira seluk.
Objetivu prinsipal husi komemorasaun ne’e mak atu dignifika no valoriza sira ne’ebé mak mate tanba defende ukun rasik-an. Alende ne’e, komemorasaun ne’e mos nu’udar medida reparasaun koletiva ba sira. Komemorasaun ne’e dezenvolve ho aprosimasaun integradu hodi transforma sofrimentu pasadu sai lisaun ba dame, kria ponte entre Estadu ho família vítima sira, no hametin nasionálismu no patriotismu iha jerasaun foun sira.
Entertantu, Centro Chega!I.P hala’o atividade hirak ne’e bazeia ba dekretu-Lei nº 48/2016, ho vizaun atu harii Sosiedade ida ne’ebé mak inklusivu, la repete istória pasadu nian, moris iha dame, no respeitu dereitus umanus. Centro Chega! nia misaun mak atu harii Centru póz-konflitu ne’ebé prezerva memória pasadu nian hodi promove direitu no valór umanu no harii parseria nasionál no internasionál hodi reforsa rede servisu sira atu implementa rekomendasaun sira husi Relatóriu Finál Comissão de Acolhimento, Verdade e Reconciliação (CAVR)- Chega! no Per Memoriam Ad Spem (PMAS) husi Comissão da Verdade e Amizade (CVA), sira ne’ebé relevante.
Detallu informasaun klik docpdf:Komunikadu Imprensa Masakre Larisula-BCU
