(Dili, 15 Outobru 2026) – Centro Nacional Chega!I.P asina Nota Entendementu ka Memorandum of Understanding (MOU) ho Universidade Nacional Timor Lorosa’e (UNTL) iha área kooperasaun 3 mak hanesan; Ida, Dezenvolve Kurrikulu no Metodolojia Pedagojia, iha área sira hanesan edukasaun ba dame, istória, direitus umanus no justisa tranzasionál. Rua, Rekursus pertinente sira, hanesan  Arkivu, Biblioteka, Sítiu Istoriku no Muzeu. Tolu, Kolaborasaun no partisipasaun iha  peskiza konjunta, formasaun tematika sira, konferensia, palestra akadémika, jornada sientífika, semináriu, simpoziu no enkontru akadémiku sira seluk.

Dokumentus ofisialmente ne’e asina husi Reitór Universidade Nacional Timor Lorosa’e (UNTL), Prof. Dr. Joviano Antonio da Costa, M. Eng. no Diretór Ezekutivu Centro Nacional Chega!I.P, Hugo Maria Fernandes, ne’ebé hala’o iha Salaun Ian Martin, INFORDEPE Balide-Dili.

Objetivu husi asina Nota Entendementu ne’e mak, atu hametin kooperasaun entre instituisaun rua (Centro Chega!I.P ho UNTL), ba konseitu no implementasaun programa, asaun no atividade hodi apoiu estabelesimentu departamentu (kursu) istória iha Fakuldade Filozofia no Siénsias Umanas, Universidade Nacional Timor Lorosa’e. Atu koopera malu iha programa, planu asaun no atividade sira ne’ebé sei estabelese hamutuk hodi apoiu ba dezenvolvimentu institusional liu-liu Departamentu Istória UNTL.

Objetivu seluk mak atu apoiu departementu (kursu) Istória iha Fakuldade Filozofia no Siénsias Umanas-UNTL. Integra Modulu Chega! Kona-ba istória, direitus umanus, justisa tranzisional no edukasaun dame iha prosesu aprendisajen tuir natureza fakuldade ida-idak nian iha UNTL. Hametin kualidade prosesu aprendizajen iha área istória, direitus umanus, justisa tranzisional no edukasaun dame  liu husi dezenvolvimentu no aplikasaun métodu inovativu, kapasitasaun kontinua ba dosente, apoiu material didátiku no implementasaun atividade prátika ba estudante sira. Promove peskiza no publikasaun akademika konjunta kona-ba istória, memória, direitus umanus, rekonsiliasaun, prevensaun konflitu no tema relevante sira seluk, hodi mellora koñesimentu no kapasidade institusional husi parte sira. Estabelese no realiza atividade extra-kurrikular hanesan semináriu, palestra, konferensia no visita sítiu istoriku no partisipa atividade seluk sira ne’ebé instituisaun rua dezenvolve.

Kooperasaun servisu ne’e hala’o bazeia ba misaun Chega! nian mak promove implementasaun rekomendasaun sira husi relatóriu Chega! relasiona ho institusionalizasaun memória no promosaun direitus umanus atraves edukasaun, formasaun no solidariedade ba sobreviventes mais vulneraveis husi violasaun direitus umanus, nune’e mos promove implementasaun rekomendasoens komuns entre CAVR no CVA kona-ba reparasaun, memorializasaun, estabelesementu Sentru Nasional Memória, Pesquiza no Aprendizazen tuir kna’ar no mandatu ne’ebé hatur ona iha dekretu lei nú. 48/2016, artigu 7 hateten “Colaboracão com outras entidades”, ne’ebé tem iha número 3) no junta hamutuk ho artigu 6 kona-ba Kompetensia sira, espesifika iha alinea b) no j) husi lejislasaun ida ne’e, ne’ebe aprova estatuto husi CNC! I.P.

Atividade ne’e hala’o bazeia ba dekretu-Lei nú. 48/2016, ho vizaun atu harii Sosiedade ida ne’ebé mak inklusivu, la repete istória pasadu nian, moris iha dame, no respeitu dereitus umanus. Centro Chega!I.P nia misaun mak atu harii Sentru Póz-konflitu ne’ebé prezerva memória pasadu nian hodi promove direitu no valór umanu no harii parseria nasionál no internasionál hodi reforsa rede servisu sira atu implementa rekomendasaun sira husi Relatóriu Finál Comissão de Acolhimento, Verdade e Reconciliação (CAVR)- Chega! no Per Memoriam Ad Spem (PMAS) husi Comissão da Verdade e Amizade (CVA), sira ne’ebé relevante.

Download doc.pdf:Komunikadu Imprensa Asina MoU CNC-UNTL