Dili – (23 Maiu 2026), Centro Nacional Chega!I.P organiza Festival Literasia, durante loron 3 (21-23) ho atividade oin-oin. Atividade ida mak Diskusaun Livru hodi hasoru malu ho autór livru sira mak hanesan,  Autór Livru ho titulu “Antes Sem Titulo do que Sem Patria” husi Carlos Saky. Autora Livru  ho titulu “Moono: The Adventure & The Shadow War” husi Andrea Hilaria Li, no Apolinário Ximenes nu’udar peskizadór Centro Chega!I.P ne’ebé hakerek livru ho titulu “Muzika Populár no Rezisténsia iha Períodu Okupasaun”. Atividade Diskusaun Livru ne’e realiza iha Salaun Konferensia Centro Chega!I.P, Antigo Comarca Balide.

Relasiona ho atividade Diskusaun Livru ne’e, Autora Livru  ho titulu “Moono: The Adventure & The Shadow War”, Andrea Hilaria Li, hato’o apresiasaun ba servisu Centro Chega!I.P ne’ebé mak oraganiza ona eventu Festival Literasia no konvida ona nia hodi sai oradóra iha atividade diskusaun refere.

Andrea esplika katak, “Festival literasia ne’e importante tanba la’os de’it sira promove kona-ba livrus, literasia, maibé mos sira bele hasoru autores livru sira no maluk sira seluk hodi konversa no komunika kona-ba valor-valor sira ne’ebé mak eziste iha saida de’it. Festival literasia ne’e importante tebes la’os de’it promove atu dezenvolve kapabilidade intelektual husi maluk sira ne’ebé mak partisipa”.

Nia subliña, iha eventu Festival Literasia ne’e, ba joven no foinsa’e sira importante tebes liu husi eventu ne’e bele fanun joven sira katak tempu to’o ona mai ita hodi sai foinsa’e ida ne’ebé ke ran nakali ba buat ne’ebé mak di’ak, sai hanesan exemplu katak, joven tenke ativu ba hodi promove ita nia literasia, ativu hodi promove literatura no ativu involve-an iha influensia decision making.

Eventu Festival literasia hodi promove istória no direitus umanus, Andrea  afirma katak, istoria importante tanba liu husi istória ita aprende kona-ba ita nia identidade, no la’os de’it ita nia identidade, maibé mos ita ita nia identidade bele fo mai ita prinsipiu exemplu prinsipiu Timoroan. Iha istória ita ko’alia kona-ba solidariedade hamutuk manan injustisa. Ita mantein karakteristik refere atu ita bele kontinua sai sosiedade ida ne’ebé mak iha unidade no solidariedade no unidade ita bele hasoru situasaun saida de’it mak akontese hela no akontese iha futuru. Entertantu, atividade diskusaun livru ne’e hetan partisipasaun husi joven no estudante sira.

Media Chega!.