Dili – (23 Maiu 2026), Diretór Divizaun Edukasaun no Formasaun (DEF), Alexandre Hornay Pinto reprezenta Centro Nacional Chega!I.P halo enseramentu ba atividade Festival Literasia ne’ebé realiza iha Antigo Comarca Balide, ne’ebé la’o durante loron 3 hahu (21-23).
Iha serimonia enseramentu, Diretór Divizaun Edukasaun no Formasaun (DEF), Alexandre Hornay Pinto hateten katak, Festival Literasia ne’ebé hala’o durante loron 3 la’o ho di’ak no hetan partisipasaun maximu husi entidade sira.
Festival Literasia ne’e kompleta ho atividade oin-oin hanesan, Diskusaun Tematiku, Diskusaun Livru, Workshop, Live Painting, Arte ba labarik, Konta ai-knanoik, Deklamasaun Poezia, Feira do livru no Chega! Tour!.
Diretór informa katak, Festival Literasia ne’e nu’udar forsa liafuan, no mos obra sira ne’ebé aprezenta iha Festival Literasia ne’e parte ida sai hanesan forsa maior ida atu nune’e muda sosiedade.
Nia argumenta, iha loron 3 nia laran ita rona oradór sira nia aprezentasaun ba obra livru sira ne’ebé sira hakerek, ita rona oradór sira nia aprezentasaun asuntu oin-oin liu-liu ba tematiku sira no mos balun fahe istória.
“Hau hanoin katak ne’e bele inspira ita, no mos hein katak Festival Literasia ne’e la’os de’it bele kontinua promove ita nia kapasidade atu lee no hakerek, maibé mos ajuda ita atu komprende, atu nafatin kestiona, husu liu-liu atu ita bele imajina no mos kria obra sira”, dehan Diretór DEF, Alexandre Hornay, iha diskursu enseramentu Festival Literasia.
Diretór DEF lori Centro Chega!I.P nia naran hakarak hato’o, agradesementu ba maluk sira ne’ebé mak organiza eventu ne’e, primeiru, agradese ba Konselu Polisiamentu Komunitaria (KPK) ne’ebé ajuda organiza tranzitu ne’ebé bele la’o ho di’ak, agradese ba artista sira hanesan, Artista Muzika, Teatru, Live Painting, Diskusaun Livru, Diskusaun Tematiku oin-oin, Arte ba Labarik sira, parte kulinaria sira ne’ebé mai husi joven kreativu no sobrevivente sira inklui kolega sira husi Komisaun Organizadora ba Festival Literasia no Night Market nian durante loron 3 ne’ebé servisu maka’as los.
“Hau hanoin eventu ne’e la’os pontu final maibé hanesan pontu virgula ida hein katak saida mak aprende iha Festival ne’e kontinua no halo iha uma, iha eskola no iha komunidade no iha fatin seluk. Hein karak literatura nafatin ispira ita hotu”, Diretór DEF subliña.
Media Chega!.
