Dili, (17 Abril 2026) – Centro Nacional Chega!I.P organiza Feira Livru iha ámbitu komemorasaun masakre 17 Abril 1999 “Rezidensia Manuel Carascalão”, ba dala-27, ne’ebé hala’o iha Fundasaun Oriente. Atividade ne’e kompleta ho Ezibisaun Livru, Diskusaun Livru, Diskusaun Tematiku, Story Telling, Chega! Tour, Sobrevivente sira konta istória kona-ba masakre 17 Abril 1999 no mos karii aifunan ba iha fatin bee posu ne’ebé milisia sira uluk oho no soe ba iha laran.
Iha diskusaun livru ho oradór sira hanesan Abilio Soares ko’alia kona-ba “Janji Yang Tertinggal Di Ruang Gelap” no Ilidio Agusto Guterres nu’udar eskritór livru ho titulu “Introdusaun Filozofia Politika ba Timor-Leste” ne’ebé fahe esperensia ba estudante sira kona-ba maneira hakerek livru. Iha parte diskusaun tematiku ho oradór Jose Luis Oliveira ko’alia kona-ba “Relatóriu Chega! Kapitulu 6: Perfile Violasoes Direitus Umanus”. Iha atividade Chega! Tour nian estudante sira vizita fatin istóriku sira hanesan, Casa Europa, Sede UDT, Ponte Kais no Fundasaun Oriente. Iha parte atividade feira livru nian partisipa husi Movimentu Letras, Xanana Reading Room, I Learn Book Store no Biblioteka Centro Chega!I.P.
Atividade hirak ne’e, hetan partisipa maximu husi Estudante Ensinu Superior sira ne’ebé mai husi Universidade da Paz (UNPAZ), Dili Instituto of Thecnology (DIT), Universidade Nasional Timor Lorosa’e (UNTL) no Eskola Sekundaria Kristal ho total partisipate hamutuk atus rua resin. No atividade ne’e marka mos prezensa husi Membru Konsellu Administrasaun Centro Chega!I.P, Aniceto Guro Berteni Neves.
Diretór Ezekutivu Centro Chega!I.P, Hugo Maria Fernandes iha diskursu abertura, destaka importansia husi atividade Feira Livru iha ámbitu komemorasaun masakre 17 Abril 1999 “Rezidensia Manuel Carascalão”, ba dala-27. No afirma, komemorasaun ne’e parte husi pograma memorializasaun tanba liu husi komemorasaun ne’e atu valoriza, dignifika no fo ondra ba sira ne’ebé mak mate iha masakre 17 Abril 1999 nian no balun ne’ebé ohin loron sei moris terus hela.
“Komemorasaun ne’e iha aspeitu tolu importante, Ida, ba ema sira ne’ebé mak mate, ne’ebé mak kontinua lori hela terus, lakon oan, lakon inan aman, iha fatin ne’e. Segundu, ita komemora fatin ne’e nu’udar fatin istoriku ida. Terseiru vizita fatin istoriku liu husi atividade Chega! Tour”, dehan Diretór iha abertura atividade feira livru iha Fundasaun Oriente, Sexta-feira (17 Abril 2026).
Iha biban ne’e, eskritór livru ho titulu “Janji Yang Tertinggal Di Ruang Gelap”, Abilio Soares hato’o nia apresia a’as ba Centro Chega!I.P ne’ebé organiza ona atividade feira livru iha ámbitu komemorasaun masakre 17 Abril 1999 “Rezidensia Manuel Carascalão”.
“Eventu sira ne’e importante tebes tanba ema halo komemorasaun hanesan ne’e ho atividade ne’ebé formal, ema ba rame-rame, hasae bandeira, han hemu, depois hotu ona, maibé ida ne’e parte pozitivu tanba konvida estudante sira, joven sira ke dalaruma nunka hatene istória kona-ba masakre 17 Abril 1999, sira mai iha ne’e, bele hatene istória”, nia apresia.
Nia mos agradese Centro Chega!I.P tanba konvida ona nia hanesan eskritór livru ho titulu “Janji Yang Tertinggal Di Ruang Gelap” ne’ebé fahe esperensia kon-ba hakerek livru kona-ba istória alin Ze nian ne’ebé milisia sira oho iha Maliana.
“Hau fiar ema idak-idak iha ninia istória. Hanesan hau rasik hakerek no ema seluk bele hakerek dadauk, ida ne’e oportunidade di’ak ida. Hau nia korajen ba estudante sira hakerek hahu agora se la’os agora bainhira tan, se la’os ita se tan mak hakerek. Se lae istória sira dala barak male mak hakerek husi pontu de vizista malae sira nian”, eskritór ne’e enkoraja.
Estudante DIT, Eulia A. de Souza Soares hato’o sentimentu kontente tanba bele mai partisipa iha atividade ne’e hodi rona istoria. “Hau sente kontente no orgullu tanba hanesan estudante mai aprende istória pasadu ita nia avo, maun no tiu sira uluk hola parte luta ba ukun rasik-an”.
Nune’e mos, Profesor husi Dili Instituto of Thecnology (DIT), Igildo dos Santos espresa sentimentu kontente no subliña katak, atividade ne’e di’ak tebes tanba bele konvida sira partisipa iha atividade Feira Livru iha ámbitu komemorasaun masakre 17 Abril 1999. “Ami orgullu tebes tanba ida ne’e oportunidade di’ak bele hetan informasaun. Hau sujere ba oin realiza tan atividade Feira Livru”.
Feira Livru hola parte iha atividade Centro Chega!l.P liu husi Divizaun Edukasaun no Formasaun (DEF) nian, iha atividade Jestaun Biblioteka ho nia knaar prinsipal ida mak atu promove Biblioteka Centro Chega!I.P nu’udar sentru sabedoria ida ne’ebé asesível ba ema hotu liu-liu foinsa’e ka estudante hodi hatene kona-ba istória no memória pasadu Timoroan nian ne’ebé mak prezerva iha Centro Chega!I.P.
Entertantu, atividade hirak ne’e hala’o hodi hatan ba mandatu Centro Chega!I.P nian ho baze ba dekretu lei Nu. 48/2016 katak kontinua hala’o nafatin ba servisu sira ne’ebé Comissão de Acolhimento, Verdade e Reconciliação (CAVR) no Comissão Verdade e Amizade (CVA) hala’o tiha ona. Vizaun mak prezerva memória pasadu nian nu’udar lisaun ba Povu Timor-Leste no umanidade tomak hodi hetan dame. Misaun mak hari’i sentru póz-konflitu ne’ebé prezerva memória pasadu nian hodi promove direitu no valor umanu; Hari’i parseria nasional no internasional hodi reforsa rede servisu sira atu implementa rekomendasaun CAVR no CVA ne’ebé relevante.
Media Chega!.
