Díli, (21 Jullu 2025) – Centro Nacional Chega!I.P, Da Memória à Esperança (Centro Chega! I.P) hamri’ik nu’udar institutu públiku ida ne’ebé estabelese ho dekretu Lei no. 48/2016. Centro Chega!I.P nia vizaun mak: “Sosiedade ida ne’ebé inkluzivu, la repete istória passadu nian, moris iha dame, no respeitu ba direitus umanu”. Nia misaun mak: “Harii sentru Pós-konflitu ne’ebé prezerva memória pasadu nian hodi promove direitus no valór umanu, harii parseria nasionál no internasionál hodi reforsa rede servisu sira ba implementasaun rekomendasaun sira husi Relatóriu Finál Comissão de Acolhimento, Verdade e Reconciliação (CAVR)-Chega! no Comissão da Verdade e Amizade (CVA) – Per Memoriam Ad Spem, sira ne’ebé relevante”.
Hatan ba misaun ne’e, Centro Chega!I.P iha ninia biblioteka rasik hodi rai livru sira hanesan Relatóriu Chega!, Relatóriu Per Memoriam ad Spem, livriñu Sítiu Istóriku, Hatutan Memória, Memória 7 Dezembru 1975, Feto ho Konflitu, Labarik no Konflitu, Penjara Comarca Balide, Livru Xanana, Livru Sabemos e Podemos e Devemos Vencer no mos livru sira seluk ne’ebé ko’alia kona-ba asuntu direitus umanus.
Nune’e, iha última fulan Maiu to’o iha fulan Juñu 2025, estudante barak mak mai ona asesu livru sira iha Biblioteka Centro Chega!. Livrus ne’ebé estudante sira asesu mak hanesan, Relatóriu Chega! Relatóriu Per Memoriam ad Spem, livriñu Sítiu Istóriku, Hatutan Memória, Memória 7 Dezembru 1975, Feto ho Konflitu, Labarik no Konflitu, Penjara Comarca Balide, Livru Xanana, Livru Sabemos e Podemos e Devemos Vencer no sira seluk tan.
Iha publikasaun ida ne’e, Centro Chega!I.P hakarak fahe informasaun kona-ba sentimentu vizitante sira nian durante vizita Biblioteka Centro Chega!I.P.
Estudante, Evaristo G. de Almeida, Departamentu Filosofia-UNTL espresa, sentimentu “Orgullu tebes bele mai asesu Biblioteka Centro Chega!I.P, atendimentu ba vizitante sira ho di’ak tebes no fatin ne’ebé mak seguru”. Hau nia rekomendasaun estudante sira husi primária to’o enisnu superior bele mai asesu biblioteka Centro Chega! ho gratuitu.
Estudante, Epifania Ximenes, Departamentu Educação Física e Desporto-UNTL, “Sente entuziasmu ba asesu livrus istóriku sira iha Biblioteka Centro Chega!I.P tanba fasilita tebes ha’u hatene istória pasadu, hodi hareé ba futuru. Biblioteka Centro Chega!I.P fatin seguru no hakmatek ba ita atu estuda”. Ha’u nia rekomendasaun ba kolega estudante sira ne’ebé hakarak estuda bele mai iha Biblioteka Centro Chega!I.P.
Estudante, Efrem Ximenes Guterres, Departamentu Engenharia Civil-UNTL, “Ha’u sente motivadu no konfortável lee no halo traballu iha Biblioteka Centro Chega!I.P Wainhira ita lee sente inspiradu no loke ita nia hanoin tanba ko’alia indireta ho autór livru sira liu-liu kona-ba istória, biografia, nst. Tanba ne’e, ha’u iha interese ba hatene istória Timor nian”. Ha’u enkoraja no konvida kolega estudante no joven sira atu bele mai asesu Biblioteka Centro Chega!I.P.
Biblioteka Centro Chega!I.P nafatin konvida ema hotu atu mai asesu livru sira kona-ba istória Timor-Leste, relatóriu CAVR no CVA nian no mos livru sira seluk tan. Keta haluha aproveita imi nia tempu mai aprende istória.
Media Chega!.
