Bobonaro – (16 Outobru 2023), Centro Nacional Chega!I.P atribui Premiu “Jornalizmu ba Paz” Maria Gorreti Joaquim ba manan na’in kategória media televizaun, online no imprimi ne’ebé di’ak liu. Premiu ne’e, atribui iha ámbitu komemorasaun Masakre Balibo Five ba dala-48 no loron Nasional Liberdade Imprensa ba dahuluk, ne’ebé realiza iha Postu Administrativu Balibo, Munisipiu Bobonaro.
Komemorasaun hahu ho misa iha Igreja parókia Santu António Balibo, kari aifunan ba jornalista na’in 5 nia fatin oho no sunu sira nia isin ba. Jornalista na’in 5 mak; Greg Shackleton (29), Tony Stewart (21), no Gary Cunningham (27) husi media HSV-7, Melbourne, no Briton Brian Peters (29) ho Malcolm Renie (28) husi media TCN-9, Sydney.
Centro Chega!I.P atribui Premiu “Jornalizmu ba Paz” ba manan na’in ho kategória Media Televizaun dia’k liu mak GMN TV ho titulu “Maske ferik ona no forsa lato’o maibé sei lahamate Avo Bi-Liba nia espeiritu no vontade hodi luta ba moris kiak no mukit”, Media Imprimi dia’k liu mak Jornal Independente ho titulu “Amilca no Istoria Luta Oan-feto Ida” no Media Online dia’k liu mak Lafaek News ho titulu “Balada Fuik-Lian Hamaluk Defisiensia Adriano Iha Hadak Fohuk-Leten Tinan 4”.
Premiu atribui husi Membru Konsellu Administrasaun Centro Chega!, Pe. Juvito Rego de Jesus de Araújo, Reverendo, Arlindo Marçal no Prezidente Painel Juri, Amito Qonusere Araujo. Serimonia ne’e, partisipa husi Sekretáriu Estadu Komunikasaun Social (SeKomS), Expedito Dias Ximenes, Provedor de Direitos Humanos e Justiça (PDHJ), Virgílio da Silva Guterres “Lamukan”, Prezidente Autoridade Munisipiu Bobonaro, Ernesto Oliveira Barreto no entidade relevantes.
Membru Konsellu Administrasaun Centro Nacional Chega!I.P, Pe. Jovito Rego de Jesus Araújo iha diskursu atribuisaun Premiu katak, Centro Chega!I.P atribui Premiu “Jornalizmu ba Paz” Maria Gorreti Joaquim ba media hanesan meiu ida atu memorializa jornalista no ativista direitus umanus hirak ne’ebé mate tanba halo sira nia knaar iha pasadu liu husi hakerek no publika ho baze-ba lia-loos, paz no justisa hodi hakonu direitu povu nian mezmu saran sira nia vida iha risku nia laran.
Prémiu Jornalizmu ba Paz ne’e mos hanesan meiu ida atu kontinua enkoraja jornalista no ativista sira hodi kontribui ba paz no promosaun direitus umanus iha ámbitu harii sosiedade ida ne’ebé sei la repete tan hahalok violénsia sira ne’ebé mak akontese ona iha pasadu.
Atribuisaun Premiu Jonrnalizmu ba Paz ba dala-4 hahú iha tinan 2020. Premiu ida ne’e, manan na’in mak media online Neon Metin, iha 2021 manan na’in rua mak media imprimi Jornal Independente no Media Online Lafaek News, iha tinan 2022 manan na’in tolu mak media Televizaun GMN TV, media Imprimi Jornal Independente no Online Lafaek News no tinan 2023, manan na’in mak media Televizaun GMN TV, media Imprimi Jornal Independente no Online Lafaek News
Pe. Jovito argumenta, media hirak ne’e, durante tinan ida halo kobertura hodi fo sai fo sai povu marjinalizadu nian lian ba publiku kona-ba dezenvolvimentu nasional ne’ebé la’o iha rai laran, maibé sira seidauk sente.
“Iha kalan ida ne’e, hodi CNC nia naran hakarak agradese ba media sira hotu, atu servi nasaun ida ne’e liu husi hakerek, liu husi lian, liu husi media eletronika, fo sai kona-ba direitus umanus ema nian liu-liu ema sira ne’ebé moris marjinalizadu iha sosiedade ida ne’e,” diskursu Membru Konsellu Administrasaun Chega! iha serimonia atribuisaun Premiu ne’ebé realiza iha Balibo.
Ho ida ne’e, nia rekomenda, ba media sira ne’ebé seidauk hetan premiu ida ne’e, keta laran susar, kontinua esforsu-an kontinua promove direitus umanus no luta nafatin hodi promove soseidade marzinalizadu nia lian ba publiku, maske tinan ida ne’e imi lahetan, maibé tinan tuir mai imi sei hetan.
Husu ba maluk jornalizmu hotu-hotu katak ida ne’e la’os ultimu premiu, sei kontinua nafatin. Ida ne’e atu susita iha jornalista sira hotu katak ita laservisu de’it ba objetivu kiik oan ida, ita laservisu ba buat ida, lae?. Ita servisu ba umanidade tomak iha rai Timor Lorosa’e. Ba imi hotu-hotu ne’ebé seidauk simu Premiu ida ne’e ami nafatin fo korajen ba imi atu imi nia esforsu atu buka nafatin oinsa mak atu bele promove ema nia direitus umanus,” nia enkoraja.
Atribuisaun premiu Maria Gorrete Joaquim “Jornalizmu ba Paz” bazeia ba rekomendasaun sira katak, ema hotu ne’ebé halo publikasaun, jornalista no seksaun imprensa hotu-hotu, tenke rekoñese katak sira nia responsabilidade ne’e buat ida ne’ebé importante tebes ba sidadaun sira iha Timor-Leste sai efetivu-liu, no sira nia responsabilidade profisionál bo’ot tebes mak fo notísia ne’ebé independente no loloos, informasaun hirak ne’e hato’o mós ho pontu de vista alternativu kona-ba problema públiku ne’ebé importante, ba sektór oi-oin iha sosiedade Timor tomak.
Imprensa, hala’o atividade kondekorasaun annual ba servisu jornalizmu investigasaun nian ne’ebé jornalista Timor-Oan sira halo, no kondekorasaun ne’e, fo atu nune’e hasa’e onra ba jornalista hirak ne’ebé mate ona iha Timor-Leste, bainhira sira hala’o sira nia knaar buka lia los durante periodu 1974-1999.
Media Chega!.
