Dili – (18 Setembru 2026), Centro Nacional Chega!I.P liu husi programa Chega! Young Ambassador (CYA) servisu hamutuk ho Timor-Leste Youth for Peace (TLYFP) organiza atividade Chega! Museum Day hodi selebra International Day of Peace iha Timor-Leste ba dala-16 ho tema global “Invest In Peace – For Everyone, Everywhere, Everyday.” Tematiku sentral ba atividade Chega! Museum Day mak “Hamutuk Ita Hahu ho Diálogu Interjerasional Hodi Hari’i Dame Ne’ebé Sustentável no Prepara-an ba Ita-Boot Nia Kareira iha Futuru.” Atividade ne’e realiza durante loron 2 (17-18), kompleta ho atividade wokshop, expozisaun no live music.

Atividade hirak ne’e hala’o ho objetivu mak atu aumenta estudante no joven sira nia koñesimentu kona-ba memória istórika, paz, direitu umanus no konstrusaun paz. Atu fasilita estudante no joven sira komprende liu tan kona-ba impaktu konflitu no importánsia rezolusaun konflitu. Fahe esperiensia no halo reflesaun hamutuk kona-ba istória pasadu.

Iha abertura atividade selebra International Day of Peace, Diretór Ezekutivu Centro Nacional Chega!I.P, Hugo Maria Fernandes hato’o parabens ba CYA no TLYFP tanba bele organiza ona atividade hodi selebra International Day of Peace iha Timor-Leste.

Diretór haktuir, Joven nu’udar ajente transformadór iha sosiedade presiza hala’o atividade sira hanesan ne’e ba oin iha sosiedade Timor-Leste, atu ema hotu partisipa komprende kona-ba paz, nune’e halo dezenvolvimentu. Iha istória pasadu Timor-Leste nian hatudu konflitu barak ne’ebé akontese tanba iha diferensia ideolojia, diferensia estratejia, diferensia diverjensia politika, tan ne’e, joven sira tenke ativamente halo atividade ne’e atu bele kria paz no estabilidade.

“Centro Nacional Chega!I agradese ba parseria, hau fiar katak iha atividade ohin no aban, kontinua fahe esperensia ba malu, no kontinua kontaktu malu oinsa mak partilla misaun sira. Maske iha pasadu akontese konflitu barak, ikus ita hetan ukun-an. Ita orgullu nu’udar nasaun ida tanba rai kiik ida funu mesak laiha apoiu husi nasaun seluk”, Diretór enkoraja.

Iha sorin seluk, Xefe Operasional g7+, Feliz Piedade hato’o parabens ba joventude sira hodi selebra International Day of Peace. International Day of Peace signifikadu ba ita mak atu fo hanoin ba joventude sira tenke fo kontribuisaun ba paz iha sosiedade ida ne’e.

Ohin loron ita sai nasaun ida libre no independente kontribuisaun maka’as husi ita nia eroi sira. Situasaun ida ohin loron joven sira tenke sai ajente ba paz iha sosiedade. Joven sira tenke sai autór ba paz. Joven sira tenke sai autór ba rezolve problema iha sosiedade nia leet. Labele joven kompleindór. Ita ko’alia paz ladepende ba estadu, ladepende ba governu, maibé depende ba ita hotu inklui joventude sira.

Entertantu, CYA servisu hamutuk ho TLYFP organiza atividade Chega! Museum Day hodi selebra International Day of Peace iha Timor-Leste refleta ba Centro Chega!I.P nia vizaun mak: “Sosiedade ida ne’ebé inkluzivu, la repete istória pasadu nian hodi promove direitu no valór umanu”. No misaun mak: “Harii sentru póz-konflitu ne’ebé prezerva memória pasadu nian hodi promove direitu no valór umanu no harii parseria nasionál no internasionál hodi reforsa rede servisu sira atu implementa rekomendasaun sira husi Relatóriu Finál Comissão de Acolhimento, Verdade e Reconciliação (CAVR)- Chega! no Comissão da Verdade e Amizade (CVA) – Per Memoriam Ad Spem, sira ne’ebé relevante.

Media Chega!.