Dili – (03 Outobru 2023), iha tinan 2018, Centro Nacional Chega!I.P no Ministeriu Edukasaun (ME) asina Nota Entendimentu hodi hametin kooperasaun servisu ba fortalesimentu institusional.

Durante kooperasaun parte rua, halo ona servisu ba revizaun kurikulum ba primeiru no segundu siklu no integra materia isória ba iha Kintu no Sextu ano no mos kria modul formasaun ba profesor sira.

Servisu seluk mak Formasaun Profesores, estabelese Rede Profesores Istoria, estabelesimentu biblioteka iha eskola, Programa Chega! Tour hodi lori estudante sira vizita eventu istoriku no fatin istóriku sira iha Munisipiu Dili no Munisipiu sira seluk inklui RAEOA, Programa Hatutan Memoria hodi hanorin estudante sira hakerek inan aman nia memoria pasadu kona-ba kontribuisaun luta ba prosesu independensia no programa kompetisaun sertamen.

Ho progresu hirak ne’e, iha loron 03 Outobru 2023, Centro Nacional Chega!I.P ho Ministeriu Edukasaun (ME) asina extensaun Nota Entendimentu ho intensaun atu hametin kooperasaun servisu ba implementa rekomendasaun sira husi Relatóriu Chega! no mós Relatóriu Per Memoriam Ad Spem iha área edukasaun no memorilizasaun.

Objetivu seluk husi Nota Entendementu ida ne’e mak implementa atividade sira haktuir Rekomendasaun Chega! ba Setór Edukasaun iha ámbitu fortalesimentu institusionál no dezenvolvimentu polítika edukasaun nian. Alende ne’e mós parte rua sei realiza Planu Asaun Anuál Konjuntu hamutuk no bele halo revizaun ka alterasaun ruma tuir nesesidade ho baze ba konkordánsia mútua.

Serimónia asina Nota Entendementu ne’e partisipa husi parseiru internasional no organizasaun sosiedade sivil.

Ministra Edukasaun (ME), Dulce de Jesus Soares agradese Centro Chega!I.P ba kooperasaun servisu ne’ebé di’ak no tulun Ministeriu Edukasaun iha área istoria.

“Ohin hanesan sinal ida, ita hafoun fila fali ita nia komitmentu ne’ebé mak ita halo tiha ona, ita realiza buat barak ona”, deha Ministra Edukasaun iha diskursu seimónia asina Nota Entendimentu, realiza iha Salaun Konferensia Centro Chega!I.P Antigo Comarca Balide-Dili.

Nia haktuir, Ministeriu Edukasaun nafatin iha komitmentu atu reintera kooperasaun ida ne’e tanba kooperasaun ida ne’ebé di’ak tebes ba iha futuru.

Iha oportunidade ne’e, Diretór Ezekutivu Centro Nacional Chega!I.P, Hugo Maria Fernandes esplika, Centro Chega!I.P hanesan instituisaun publiku ida ne’ebé eziste tinan 5 no iha tinan ida ne’e (2023) kompleta tinan 6 ezistensia.

Asina Nota Entendementu ida ne’e hatudu komitmentu foun ba kooperasaun durante tinan 5. Centro Chega!I.P fiar katak, ita nia kooperasaun ne’e bele lao ho di’ak tanba Ministeriu Edukasaun nu’udar orgaun Sentral nian ba setór edukasaun bele integra konteudu husi relatóriu Chega! no CVA Per Memoriam Ad Spam iha kurikulum ensinu baziku no sekundariu.

Programa konjutan sira ne’ebé durante ne’e realiza liu husi kooperasaun entre Centro Nacional Chega!I.P ho Ministériu Edukasaun (ME) mak Workshop, Kompetisaun Certame, Estabelesimentu Biblioteka Chega! iha eskola no atividade sira seluk ne’ebé relevansia.

Dadus ba atividade sira ne’ebé halo ona

Centro Nacional Chega!I.P hamutuk ho Ministeriu Edukasaun (ME) halo ona atividade mak hanesan Kompetisaun Certame hahú iha tinan 2019 involve husi eskola Sekundaria hamutuk 167 iha munisipiu 12, inkliu RAEOA ho estudante hamutuk 501. Iha tinan 2020 eskola Sekundaria hamutuk 13 mak partisipa mai husi munisipiu 12 inklui RAEOA ho estudante hamutuk 39. Iha tinan 2021, kompetisaun nivel Ensinu Baziku Segundu Sikulu eskola hamutuk 13 partisipa ne’ebé mai husi munisipiu 5 ho estudante 39. Iha tinan 2023, kompetisaun nivel Ensinu Baziku Terseiru Sikulu partisipa husi eskola 15 iha munisipiu 9 ho total estudante 45.

Eskola ne’ebé involve ona iha programa Sertame hamutuk 208 kompostu husi

Eskola Baziku Terseiru Siklu hamutuk 28 no ensinu sekundariu hamutuk 180. Total estudante ne’ebe partisipa ona iha programa sertame na’in 624 kompostu husi ensinu baziku terseiru siklu sikulu ho estudante na’in 84 no ensinu sekundariu estudante na’in 540.

Iha tinan 2018-2020 Centro Chega!I.P hamutuk ho Ministeriu Edukasaun estabelese ona biblioteka iha eskola hanesan; ESG 04 Setembru ho livru hamutuk 320, ESG Canossa ho livru hamutuk 320, ESG Sao Miguel l ho livru hamutuk 320, Externato Sao Jose ho livru hamutuk 320, ESG Sao Miguel Arcanjo ho livru hamutuk 640, ESG IMACON ho livru hamutuk 250, ESG ANNUR ho livru hamutuk 320, ESG Paralelu Maubara Liquica ho livru hamutuk 300, ESGC Ns Senhora Fatima Turiskai Manufahi ho livru hamutuk 300, ESG Verbo-Divina Palaka Bobonaro ho livru hamutuk 250, Universidade Dili ho livru hamutuk 320, Universidade Oriental ho livru hamutuk 320. Livru hirak ne’e hamutuk 3.660 livrus.

Programa apoiu livru Chega! Popular ba Ensinu Baziku iha 2019-2021 hanesan; Externato de São Jose ho livru hamutuk 20, EBC Raifu-Maubara Liquica ho livru hamutuk 20, EBC Liquisa (1-3 ciclo) Liquica ho livru hamutuk 20, EBC das Flores Aileu ho livru hamutuk 20, EBC 3 ciclo de Ladi Covalima ho livru hamutuk 20, EBC Venançio Feirra Ainaro ho livru hamutuk 20, EBC 3 ciclo 10 Desembro ho livru hamutuk 20, EBC 3 ciclo Manleuana ho livru hamutuk 20, EBC 3 ciclo 30 de Augusto ho livru hamutuk 20, EBC 3 ciclo Fatumeta ho livru hamutuk 20, 11 EBC 3 ciclo Dr. Sergio V. de Mello ho livru hamutuk 20, EBC 3 ciclo Vila Nova Baucau ho livru hamutuk 20, EBC 3 ciclo Santa Ursula Baucau ho livru hamutuk 20, Projeto dos Centro de Aprendizagem e formação Escolar ( G-PCAFE) iha RAEOA ho livru hamutuk 601. Livru hirak ne’e hamutuk 861 livrus.

Iha 2023, Centro Nacional Chega! I.P. koopera ho Ministeriu Edukasaun liu husi INFORDEPE hodi fo formasaun Konteudu Chega! iha Siensia Sosial ba professor Ensinu Baziku Segundu Siklu na’in 73 (Feto : 29 no Mane : 44)  husi munisipiu 11 la inklui Dili, RAEOA no Atauro. Total professores Ensinu Baziku Sestu ano partisipa ona iha formasaun husi Centro Chega! no INFORDEPE   iha 2022 no 2023 hamutuk : 180   (Feto : 79 no mane 101).

Media Chega!.