Dili – (04 Setembru 2026), Centro Nacional Chega!I.P servisu hamutuk ho Arsip Nasional Republik Indonesia (ANRI) no United Nations Educational, Scientific and Cultural Organization (UNESCO) fo formasaun ba funsionáriu na’in 39 mai husi instituisaun sira hanesan, Arkivu Nasional Timor Leste (ANTL), Arkivu no Muzeu Reziténsia Timorense (AMRT), Sekretáriu Estadu Arte no Kultura (SEAK), Centro Audiovisual Max Stahl Timor-Leste (CAMSTL), Xanana Gusmão Reading Room no Centro Chega!I.P.
Formasaun ne’e la’o durante loron 5 hahu (31 Agusto to’o 04 Setembru), fasilitatór sira mai husi Arsip Nasional Republik Indonesia (ANRI), ho materia sira ne’ebé aprende kona-ba, First Line Restoration, Full Scale Restoration, Digitization of Archives, Disaster Management on Archives, Disaster Management on Archives.
Iha enseramentu formasaun, Diretór Ezekutivu Centro Nacional Chega!I.P, Hugo Maria Fernandes hato’o agradesimentu ba Arsip Nasional Republik Indonesia (ANRI) ne’ebé fasilita ona formasaun ba funsionáriu sira atu bele eleva abilidade tekniku, hasa’e koñesimentu siénsia iha área arkivu nian oinsa mak tau matan ba memória liu-liu papeis, fotografia, audio, audiovizual no sira seluk-tan.
“Servisu hamutuk ida ne’e iha benefisiu oinsa mak hasa’e abilidade tékniku no koñesimentu siénsia liu-liu oinsa mak tau matan ba memória sira liu-liu papeis, audio, audiovizual no sira seluk tan, ne’ebé mak Centro Chega!, AMRT, ANTL, SEAK no sira seluk tau matan ba memória pasadu. Tanba ne’e lori Centro Chega!I.P ho instituisaun sira seluk ne’ebé marka prezensa iha ne’e hato’o agradesimentu ba kontinuasaun servisu”, agradese Diretór.
Diretór subliña katak, formasaun ne’e mos parte importante no sai ponte ida bele suporta enkuadramentu legal Arkivu Timor-Leste nian tanba to’o ohin loron Timor-Leste seidauk iha enkuadramentu legal ba arkivu..
Entertantu, formasaun ne’e mos nu’udar rezultadu kooperasaun servisu entre Centro Chega!I.P ho ANRI ho apoiu husi UNESCO ho programa “Sharing Knowledge and Capacity Building Program on Archives and Documentary Heritage from the Republic of Indonesia to the Republic Democratic of Timor-Leste: Training on Archives Preservation Phase II”.
Media Chega!.
