Dili – (19 Marsu 2026), Centro Nacional Chega!I.P simu dokumentus istoriku Timor-Leste nian periodu 1974-1999 husi Komite Internasional Cruz Vermella (International Committee of the Red Cross (ICRC)). Dokumentus istoriku ne’e entrega ofisialmente husi Xefe Delegasaun Rejional Komite Internasional Cruz Vermella ba Timor-Leste no Indonézia, Martin de Boer, ba Diretór Ezekutivu Centro Chega!I.P, Hugo Maria Fernandes, iha Edifisiu Centro Chega!I.P, Antigo Comarca Balide.
Diretór Ezekutivu Chega!, Hugo Maria Fernandes agradese ba ICRC ne’ebé lori ona dokumentu istoriku Timor-Leste nian husi Arkivu ICRC iha Geneva ba Chega! hodi tau iha Arkivu Chega! nian. Nia afirma, ICRC entrega dokumentus ba Centro Chega!I.P hatudu konfiansa ba malu no ba oin Centro Chega!I.P kontinua hametin kooperasaun. Diretór mos fo lembra katak, iha relatóriu Comissão de Acolhimento, Verdade e Reconciliasão (CAVR) ne’ebé agora iha kontibuisaun signifikativu arkivu ICRC nian ba elaborasaun relatóriu ne’e.
“Ohin pasu primeiru ICRC komesa entrega fotografia balun ba CNC. Entrega dokumentus ne’e, iha intensaun mos kontinua kooperasaun. Sr. Marin husu sei iha oportunidade bele ba vizita, bele haree saida mak iha ne’ebá”, dehan Hugo.
Xefe Delegasaun Rejional Komite Internasional Cruz Vermella ba Timor-Leste no Indonézia, Martin de Boer esplika, ICRC lori dokumentus istoriku luta povu Timor-Leste nian periodu 1974-1999 mai entrega iha Centro Chega!I.P hodi tau iha Arkivu Chega!. Dokumentus hirak ne’e kompostu husi fotografia sira ne’ebé mak durante ne’e arkiva iha arkivu ICRC nian iha Geneva.
Martin mos husu ba Centro Chega!I.P atu labele loke dokumentus sensitivu sira ba publiku, wainhira liu ona tinan 40 mak bele loke ba publiku hodi asesu, maibé liu husi eventu ida tanba bazeia ba regulamentu ICRC nian.
Entertantu serimonia ne’e, Diretór Ezekutivu Centro Nacional Chega!I.P, Hugo Maria Fernandes no Xefe Delegasaun Rejional Komite Internasional Cruz Vermella ba Timor-Leste no Indonézia, Martin de Boer asina dokumentus no entrega fotografia simboliku ne’ebé tau iha kuadru laran.
Media Chega!.
