Dili, (16 Abril 2026) – Centro Nacional Chega!I.P hala’o avaliasaun primeiru trimestre tinan 2026 ho tema “Centro Chega! Dezenvolvidu & Funsiona Efetivamente hodi Promove Implementasaun Rekomendasaun Chega! & PMAS”, ne’ebe hala’o durante loron rua (15-16), iha Salaun Konferensia Centro Chega!, Antigo Comarca Balide ne’ebé la’o ho susesu.

Avaliasaun loron dahuluk ho divizaun sira mak hanesan Divizaun Finansas no Operasional (DFO), Divizaun Dezenvolvimentu Institusional no Rekursu Umanu (DiP-PRU), Divizaun Servisu Reparativu (DSR) no Gabinete Apoiu Orgaun Centro Chega!I.P (GAOCC). Loron daruak ho divizaun sira mak hanesan Divizaun Prezervasaun  no Memorializasaun (DPM), Divizaun Relasaun Externa Komunikasaun no Advokasia (DREKA) no Divizaun Edukasaun no Formasaun (DEF).

Avaliasaun ne’e hetan partisipasaun husi Prezidente Konsellu Administrasaun Centro Chega!I.P, Manuel Pereira ho membru sira kompostu husi Rev, Arlindo F. Marçal, Inocêncio de Jesus Xavier no Aniceto Guro Berteni Neves.

Diretór Ezekutivu Centro Nacional Chega!I.P, Hugo Maria Fernandes, iha abertura avaliasaun, fo énfaze kona-ba atividade avaliasaun primeiru trimestral tinan 2026 nian, no destaka progresu i susesu sira ne’ebé Centro Chega!I.P atinji ona iha primeiru trimestre. Diretór mos nota katak iha dezafius balun ne’ebé sai sasatan, tanba ne’e, liu husi avaliasaun ida ne’e atu deskute ho klean no fo hanoin ho ideia sira konstrutivu ba solusaun.

Avaliasaun trimestral durante loron rua, foku ba aspeitu Programa, Sub-programa no Atividade ne’ebé ezekuta iha kada trimestre bazeia ba kalendariu implementasaun iha planu ezekusaun ho meius verifikasaun mak orsamentu ne’ebé ezekuta iha kada trimestral. Avaliasaun ne’e mos nu’udar mekanizmu ida hodi sukat atinjimentu no efetividade implementasaun Planu Asaun Anual (PAA) liuhosi Planu Operasional (PO) 2026 tuir kalendáriu servisu periodikamente.

Membru Konsellu Administrasaun Centro Chega!I.P, Inocêncio de Jesus Xavier, iha enseramentu atividade avaliasaun ne’e hato’o parabens ba Diretór Ezekutivu ho estrutura tomak no mos staf sira hotu ne’ebé hala’o avaliasaun primeiru trimestre durante loron rua ho susesu no susesu ida ne’e hatudu servisu maka’as.

“Konsellu Administrasaun nafatin fiar ba kolega sira liu-liu ba Diretór Ezekutivu ho estrututa no ema hotu-hotu ne’ebé servisu iha Centro Chega! haree husi avaliasaun dezempeñu individu no institusional ne’e kontribui tebes. Ami laran metin hela ba ita boot sira. Lori Konsellu Administrasaun nia naran hakarak agradese no ensera ita nia avaliasaun ba loron rua ne’e ba trimestral dahuluk”, Inocencio agradese.

Entertantu, atividade avaliasaun trimestral ne’e hala’o hodi hatan ba Programa 510: Funcionamento e Desenvolvimento Institucional, Sub-programa 51002: Desenvolvimento Instituicional, Atividade 5100205: Planeamento, monitorização e estatísticas, ne’ebé responsabilidade husi ekipa DiP-PRU hodi organiza no implementa kada fulan tolu.

Media Chega!.