Covalima – (05 Dezembru 2025), Hafoin liu tiha serimonia nahe biti boot iha parte dader no iha parte lokraik kontinua ba misa agradesimentu iha Kapela Kasabauk, Postu Administrativu Tilomar, Munisipiu Covalima ne’ebé prezide hosi Pe. Jovito Rêgo de Jesus Araújo.
Iha liafuan hadame malu Kristu nia paz, Pe. Jovito bolu Vitima no Autor ba kazu violasaun direitus umanus pasadu hamrik iha altar santu oin, hodi sira kaer liman ba malu, hakuak malu no sarani sira sai sasin ba sira nia aktu rekonsiliasaun ne’e.
Pe. Jovito iha omilia hateten, sira halo rekonsiliasaun iha altar santu oin tanba na’i Jesus Kristu nia mate no moris hias ne’ebé ita hanaran misteriu paskua tanba misteriu paskua ne’e mak sentru ba ita nia rekonsiliasaun.
“Rekonsiliasaun di’ak liu iha altar tanba na’i jesus nia mate no moris hias ne’ebé ita hanaran misteriu paskua. Misteriu paskua ida ne’e mak sentru ba ita nia rekonsiliasaun ho povu, ita nia hamutuk ho povu”, dehan Pe. Jovito iha Omilia bainhira prezide misa agradesimentu ne’ebé hala’o iha Kapela Kasabauk, Sexta-feira (05 Dezembru 2025).
Pe. Jovito hatutan katak, ita ema moris sempre iha problema, balun sai kanek, hatudu oin buis ba malu no konta malu, maibé problema ne’ebé iha, ita hamutuk hodi rezolve tuir dalan kultura. Ita agradese ba aman maromak tanba hadomi ita maske ita ema sala nain, maibé nunka hosik ita.
Iha tempu ida ne’e, nia dehan, tempu esperansa ninian tanba tinan ne’e nu’udar tinan Jubileu esperansa nian, ne’ebé besik atu remata ona. Ohin ita halo rekonsiliasaun nu’udar hahalo esperansa ninian.
“Ohin maun ho mana hatudu hela dalan ida fo sasin kona-ba saida mak halo fo esperansa. Oinsa mak kaer liafuan Jesus nian. Aman perdua sira tan sira lahatene saida mak sira halo”, Pe. Jovito haklaken.
Lato’o simu de’it perdaun maromak nian, nia afirma, tenke fo perdaun ba malu tanba perdaun ne’e mak esperansa. Perdaun ne’e tenke sai sarani nia prioridade ida. Alende ne’e iha eukaristia no eukaristia mak eskola domin nian tanba eukaristia ita rona beibeik hateten, “ne’e hau nia isin saran ba mate tan imi”.
Entertantu, misa agradesimentu ne’e hala’o iha ámbitu Prosesu Rekonsiliasaun Timoroan (PRT) ba kazu Violasaun Diretus Humanus pasadu ne’ebé akontese iha 1999 no atividade ne’e fasilita hosi Centro Nacional Chega!I.P hamutuk ho Grupu Traballu Prosesu Rekonsiliasaun Timoroan no Asosiasaun Vitima Konflitu Politiku 1974-1999 servisu hamutuk ho autoridade lokál, lia nain, igreza, juventude, autoridade defeza no seguransa no komunidade sira.
Media Chega!.
