Lautem – (07 Agusto 2025), Centro Nacional Chega!I.P servisu hamutuk ho Autoridade Lokál, Sobrevivente, Familia Sobrevivente no Komunidade sira organiza Mini Audénsia Públiku iha ámbitu komemorasaun loron istóriku Levantamentu Armada 8 Agusto 1983 ba dala-42, Suku Leuro, Postu Administrativu Lospalos, Munisipiu Lautem.
Mini audénsia Públiku ne’e realiza iha Aldeia Luturula, Suku Leuro nu’udar espasu ba sobrevivente sira hodi konta sai sira nia istória pasadu kona-ba loron istóriku Levantamentu Armada 8 Agusto 1983. Mini Audénsia Públiku ne’e partisipa husi Presidente Autoridade Munisipiu Lautem, Melio de Jesus ko’alia kona-ba kompetensia governu lokal nian hodi prezerva istoria sira nune’e mos fo importansia ba loron istoriku sira. Membru Konsellu Administrasaun Centro Chega!I.P, Arlindo Francisco Marçal ko’alia kona-ba programa sira ne’ebé relasaun ho reparasaun ba vitima funu nian, prezervasaun memória Vitima sira nian. Presidente Konsellu Kombatente Libertasaun Nasional Munisipiu Lautem, Aurelio Freitas Ribeiro ko’alia kona-ba politika Konsellu Kombatente Libertasaun Nasional Munisipiu Lautem nian. Ministeriu Solidariedade Sosial Munisipiu Lautem, Raimundo da Costa ko’alia kona-ba politika governu nian hodi apoiu sosial ba vitima sira. Komandante Naval, Comodoro Higino das Neves “Superman” ko’alia kona-ba istória Levantamentu Armada 8 Agusto 1983.
Iha diskursu, Membru Konsellu Administrasaun Centro Chega!I.P, Rev. Arlindo F. Marçal destaka pontus importante sira kona-ba servisu Centro Chega!I.P nian ligadu ba implementasaun rekomendasaun sira husi relatóriu Chega! no CVA nian espesifiku ba asuntu reparasaun, reunifikasaun, prezervasaun memória pasadu no seluk tan. Nia esplika, komemorasaun loron istóriku Levantamentu Armada 8 Agusto 1983 ba dala-42 ne’e importante tanba liuhosi komemorasaun ida ne’e atu prezerva memória pasadu atu labele haluha, atu lori valores rezistensia nian ba ita nia jerasaun sira.
Komemorasaun ne’e forma ida fo rekoñesimentu, dignifikasaun publiku nian ba vitima no sobrevivente sira atu komunidade sira iha empatia, atu bele hetan hadomi, bele hetan apresiasaun husi ita hotu. Atu fo hatene ba públiku katak ema baibain sira mos kontribui ba luta libertasaun ida ne’e. Atu habelar relatóriu CAVR no CVA nian kona-ba kolekta memória sira. No mos atu hametin ita nia kultura no ita nia lisan, ho lia nain sira, autoridade sira, komunidade no vitima sira hodi halo tuir lisan ba sira ne’ebé mate iha fatin ida ne’e hodi hetan matak malirin atu labele repete iha futuru.
Iha biban ne’e, Sobrevivente Manuel da Costa husu ba Governu atu tau konsidera ba akontesimentu loron istóriku Levantamentu Armada 8 Agusto 1983 tanba ema barak mak mate no barak mak hetan violasaun direitus umanus.
Presidente Autoridade Munisipiu Lautem, Melio de Jesus hateten, komemorasaun Levantamentu Armada 8 Agusto 1983 fo hanoin ba Autoridade Munisipiu atu tau iha ajenda no sei deside atu tinan-tinan komemora nafatin.
Entertantu, komemorasaun ne’e kompleta ho atividade, Konsulta saúde ba vitima no sobrevivente sira, Jogo amizade futsal no voley ball, Mini audensia públiku, Misa ba matebian sira, loke filme Rejistir e Vencer, Reflesaun no sunu lilin, Icar bandera nasional no seluk tan.
Media Chega!.
