Lautém – (25 Outobru 2026), Iha tempu badak nia laran, Centro Nacional Chega!I.P ho BRIN (Badan Riset dan Inovasi Nasional)-Indonézia sei hala’o peskiza hamutuk (konjunta) ho tema “Post-Memory di Ruang Ketiga: Pertemuan Narasi Sejarah Gen Z Indonesia dan Timor-Leste”. Peskiza ne’e hala’o durante tinan 3 hahu (2026 to’o 2028). Fatin ba peskiza mak Indonézia liu-liu Yogyakarta no Kupang, no Timor-Leste mak Dili, no Maliana.
Asuntu ne’e hato’o husi Diretór Ezekutivu Centro Nacional Chega!I.P, Hugo Maria Fernandes iha abertura semináriu ne’ebé hala’o iha Com-Lautém, iha ámbitu Festival Fronteira 2026 ho tema “Interkambiu Kultural ba Hametin Rekonsiliasaun”, ho subtema “Hau Nia Rai, Hau Nia Tasi, Hau Nia Kultura”.
Objetivu prinsipal husi peskiza mak, oinsa Gen Z husi nasaun rua (Timor-Leste no Indonézia) atu komprende no interpreta memória istóriku, identidade, no relasaun sosiál pós-konflitu. Razaun foku ba Gen Z tanba Gen Z moris hafoin períodu rekonsiliasaun no la esperiénsia diretamente konflitu, nune’e sira nia memória forma husi narrativa jerasaun anteriór sira-nian (pós-memória).
“Saida mak objetivu husi projetu peskiza konjunta ida ne’e, atu buka hatene interasaun entre Gen Z sira husi Timor-Leste no Indonézia hasoru malu iha kampus, iha kafe, sira ko’alia kona-ba Timor-Leste, saida mak sira-nia perspetiva no saida mak sira ida-idak nia pozisaun. Iha ne’ebé mak sira aprende kona-ba memória sira tinan 24. Husi sira nia inan-aman, husi eskola, husi media sosial, husi livru sira”, Diretór esplika.
Hafoin remata semináriu iha parte dader, iha parte lokraik, oradór nain 2 hanesan Pradita Devis Dukarno, Peskizadór husi BRIN (Badan Riset dan Inovasi Nasional)-Indonézia, Yazalde Manaca Xavio, Diretór Divizaun Prezervasaun Memoria (DPM) halo aprezentasaun no mos diskusaun ho Gen Z sira hodi rona sira nia hanoin kona-ba memória. Iha sorin seluk, Grupu Traballu Prosesu Rekonsiliasaun Timoroan (GT-PRT) ho FKPTT (Forum Komunikasi Pejuan Timor Timur) halo avaliasaun progresu no dezafius no buka solusaun hamutuk ba futuru mai.
Entertantu, Peskiza Konjunta ne’e nu’udar implementasaun konkreta ida hosi Memorandum of Understanding (MoU) ne’ebé asina hosi CNC no BRIN iha fulan Setembru 2025 espesifikamente Sentru Peskiza Rejionál hodi hametin estudu sira kona-ba pás, arkivu dijitál sira, no rekonsiliasaun iha Sudeste Aziátiku.
Media Chega!.
