Lautém – (25 Outobru 2026), Atividade Festival Fronteira 2026 (FF-2026) ho tema “Interkambiu Kultural ba Hametin Rekonsiliasaun’, ho subtema “Hau Ni Rai, Hau Nia Tasi, Hau nia Kultura”, ne’ebé organiza husi Centro Nacional Chega!I.P, Sekretáriu Estadu Arte no Kultura (SEAK), Ministériu Administrasaun Estatal (MAE), Autoridade Munisipiu Lautém ho Gabinete Fronteira Terrestre no Maritima (GFTM), ne’ebé hala’o durante loron 3 hahu (23-25 Outobru 2026), iha Suku Com, Postu Administrativu Lautém, Munisipiu Lautém la’o ho susesu.

Festival Fronteira iha Com-Lautém kompleta ho atividade sira hanesan, semináriu, dialógu no aprezentasaun arte no mos feira produtu lokál. Iha loron dahuluk, (23 Outobru 2026), ho semináriu ho sub-tema “Promove Ekonomia Ajul iha Área Fronteiristas Entre Timor-Leste no Indonézia”. Loron daruak, (24 Outobru 2026), ho semináriu ho sub-tema “Prosesu Rekonsiliasaun Timoroan”. No aprezenta rezultadu peskiza kona-ba Prosesu Rekonsiliasaun Komunitariu no aprezenta sinteza husi aplikasaun makanizmu rekonsiliasaun liu husi nahe biti boot. Loron datolu, (25 Outobru 2026), ho semináriu ho sub-tema “Post Memória Iha Espasu Datoluk / Memoria Di Ruang Ke Tiga”. No mos aprezenta rezultadu peskiza konjunta entre Timor-Leste ho Indonézia. Diskusaun grupu liga ho sub-tema “Post Memória Iha Espasu Datoluk”. No mos halo avaliasaun ba Progresu Implementasaun Deklarasaun Dame Ambeno 2024.

Iha diskursu enseramentu, Prezidente Komisaun Organizadór FF-2026, Hugo Maria Fernandes destaka, Festival Fronteira iha Com-Lautém nu’udar marka istoriku ida ho prezensa Primeiru Ministru (PM), Kay Rala Xanana Gusmão no Prezidente Republika (PR), José Ramos Horta. Nia afirma, performa kultural durante loron 3 hatudu  ita nia memória, ita nia istória pasadu sira ne’ebé mai husi ita nia moris loron-loron forma nu’udar ita nia identidade, no wainhira forma sai ita nia identidade ne’e sai ita nia kultura tanba ne’e, jerasaun foun sira presiza aprende saida mak ita nia beala sira husik hela ba ita.

Husu ba publiku atu labele haluha istória pasadu, tuir nia, “ema ne’ebé haluha pasadu ema ne’ebé hau bele hateten katak tauk ten, tanba labrani hateke ba kotuk atu infrenta saida mak agora no haree ba oin. Hau fiar komunidade Lautém ho imi nia laran luak neon boot, fuan nakloke, brani atu hateke ba kotuk, tanba ne’e mak loron 3, hau pesoalmente sente imi nia ospitalidade, imi loke imi nia odamatan sira ba delegasaun sira mai hela, imi loke imi nia neon, imi nia klamar ho imi espiritu atu halo duni Festival ida ne’e sai duni marka istoriku ida”.

Media Chega!.