Iha kontextu selebrasaun loron Konsulta Popular ba Tinan 20, Komisaun Organizadora (KO), ne’ebe lidera hosi Kay Rala Xanana Gusmao realiza Kompetisaun Koral Muzika Rezistensia, organiza hosi Centro Nacional Chega!I.P.
Ba TAFARA.TL, iha Centro Convenção de Dili, Sabado (03/08), Aventino Ximenes nudar Koordenador Atividade hato’o katak intensaun hosi kompetisaun ida nee atu foinsa’e sira hatene tuir prosesu luta ba ukun rasik-an, ne’ebe involve partes oin-oin, inklui artista sira liu hosi k’nanuk mak sira kria.
“Por ezemplu muzika Oras To’o Ona, ne’ebe iha momentu neba fo sintidu no espiritu ba Timor-Oan hodi deside sira nia futuru,” Aventino salienta.
Kompetisaun Koral nee partisipa hosi Grupu Koral 15, maibe Grupu 3 elimina tiha tanba la hola parte iha seisaun technical meeting mak halao loron hirak liu ba. Sira sei kompete hodi hadau premiu ba primeiru ate quintu lugar, Aventino hatutan.
Iha parte seluk Prezidente Juri Pe. Aderito da Costa, SDB informa ba TAFARA.TL katak Equipa de Juri sei avalia konkorente sira bazeia ba kriterius mak estabelese tiha ona.
“Equipa de Juri sei hare hosi aspetus harmonizasaun, intuasaun, dinamika, no artikulasaun,” Pe. Aderito hateten.
Hosi observasaun TAFARA.TL, nudar Equipa de Juri ba kompetisaun koral ne’e mak Pe. Aderito da Costa, SDB nudar Prezidente ho membrus nain hat mak hanesan Paulo Pereira, Aida Soares, Gina Correia, no Mito Freitas.
Director Executivo Centro Chega! Hugo Maria Fernandes, iha ninia intervensaun ba sesaun abertura hateten katak eventu ida nee atu promove hias muzika rezistensia ba jerasaun foun sira.
“Ami koordena ona ho Ministeriu Edukasaun, Juventude no Desportu atu muzika rezistensia hirak ne’e bele hanorin iha eskola,” Hugo esklarese.
Iha faze eliminasaun loron dahuluk Grupu Koral 3 mak hola parte, konsiste hosi Grupu Domin ba Na’i hosi Tuana Laran, Nossa Senhora de Lourdes, no Movimentu Juventude St. Cecilia.* (Sandra Moniz & Metodio Caetano Moniz | TAFARA.TL | 03.08.2019).
Nutisia neé publika ona iha tafara.tl, edisaun 4 de Agosto de 2019.
