Dili – (10 Dezembru 2023), Atividade Festivál Kultura Rezisténsia Populár (FKRP) ne’ebé Centro Nacional Chega!I.P hamutuk ho Asosiasaun Venu organiza durante loron haat hahú loron 7 – 10 Dezembru 2023 ho tema “Funu, Memória, no Trauma ba Esperansa”, iha relevansia ba servisu Sekretáriu Estadu Arte no Kultura (SEAK) no Provedoria Direitus Umanus no Justisa (PDHJ-Sigla Portugués) nian.
Sekretáriu Estadu Arte no Kultura (SEAK), Jorge Soares Cristovão hateten, iha tinan 2024 sei hamutuk ho Centro Nacional Chega!I.P no Provedoria Direitus Umanus no Justisa (PDHJ-Sigla Portugués) hodi organiza Festivál Kultura Rezisténsia Populár.
Sekretáriu Estadu esplika, razaun prinsipál ba SEAK hamutuk ho Centro Chega! organiza Festivál iha tinan 2024, tanba Festivál ne’e iha ligasaun ho atividade arte no kultura nian.
Razaun seluk mak, Festivál ne’e involve husi grupu joventude sira hodi aprezenta sira nia kreatividade arte no kultura. Entaun, ida ne’e sai nu’udar meiu ida ba ita atu hametin unidade nasionál, kria paz no fraternidade umanu entre joventude sira.
“Hanesan Sekretáriu Estadu Arte no Kultura hakarak hato’o apresiasaun, tanba bele involve mos husi grupu juventude sira hotu. Ho atividade sira ne’e, hodi ita atu hametin liu tan ita nia unidade, paz, fraternidade”, dehan Sekretáriu Estadu Arte no Kultura iha diskursu enseramentu Festivál Kultura Rezisténsia Populár, iha Portu Dili.
Festivál sai nu’udar aprosimasaun kulturál ida mak liu husi aprezenta memória koletiva ho meiu kriativa iha forma artistika oin-oin, bele sai nu’udar espasu refletivu no didátika ida ba harii dame no rekonsiliasaun.
Nune’e, liu husi Festivál ne’e atu bele halibur joven sira hamutuk, atu husik buat ne’ebé akontese iha pasadu sai memória. Joven sira agora tenke hamutuk hodi hateke ba oin hodi hadia povu no rai ida ne’e liu husi dalan dezenvolvimentu nasional.
Festivál ne’e hanesan eventu públiku ne’ebé demonstra kriatividade artistika kontemporanea oin-oin ne’ebé esplora efeitu psikolójiku husi funu ba Timoroan nia moris loron-loron nian, ne’ebé moris ho memória pasadu kona-ba funu no violénsia pasadu nian iha ninia kakutak.
“Eventu ida ne’e ita atu hanoin hikas buat ne’ebé liu ona, eventu ida ne’e mos iha ligasaun makaas ho atividade arte, atividade kultura nian, tanba atividade ne’e la’o iha palku tolu ne’ebé mak liga atividade arte nian, arte pintura, muzika, arte lubuk ida mak sira hala’o”, esplika SEAK.
Tanba ne’e hodi governu nia naran hakarak apresia atividade Centro Nacional Chega!I.P nian ne’ebé mai ho inisiativa di’ak tebe-tebes. Hanesan ohin, provedor direitus umanus hateten, “iha tinan oin ita sei servisu hamutuk hodi hala’o ho tempu ne’ebé naruk liu tan ba atividade hanesan”.
Provedór Direitus Umanus no Justisa (PDHJ-Sigla Portugués), Virgilio da Silva Guterres “Lamukan” reforsa, Festivál Kultura Rezisténsia Populár (FKRP) ne’e iha ligasaun ho asuntu direitus umanus tanba ko’alia kona-ba funu, ko’alia kona-ba liberdade, tanba ne’e, iha tinan oin ita sei halo atividade ho tempu ne’ebé naruk.
“Ba tinan oin ita bele hahú antes liu por exemplu 28 de Novembru hotu, ita bele hahú kedas atividade feira, aprezentasaun artistika, expozisaun, mai taka iha dia 14 Dezembru nu’udar loron nasional tais nian”, nia informa.
Festivál Kultura Rezisténsia Populár (FKRP) hanesan kriatividade artistika ne’ebé demonstra liuhusi “pinta, instalasaun ka projesaun, eskultura, teatru, poezia, monólogu, múzika esperimentál, ka kombinasaun entre forma artístika oin-oin hodi kria arte performativa ne’ebé hamosu efeitu májiku ida”.
Enkuantu, Festivál Kultura Rezisténsia Populár hahú iha loron 7 Dezembru nu’udar Loron Nasional Memoria nian no remata iha Loron 10 Dezembru nu’udar Loron Mundial ba Direitus Umanus.
Iha oportunidade ne’e, Sekretáriu Estadu Arte no Kultura (SEAK) konvida Centro Nacional Chega!I.P, PDHJ no entidade sira seluk, atu partisipa mos atividade selebrasaun loron Nasional Tais nian ne’ebé monu iha dia 14 Dezembru 2023 ba dala-2.
Atividade selebrasaun loron Nasional Tais sei hala’o iha dia14 Dezembru 2023 ne’ebé sei hahú ho atividade long mars husi Palasiu Prezidensial, Aitarak Lara to’o iha Centro de Convenções de Dili (CCD)
(Media CNC)
