Dili – Centro Nacional Chega.I.P servisu hamutuk ho Diresaun Nasionál Prevensaun Konflitu Komunitária (DNPKK) iha Ministériu Interior, Organizasaun g7+ no ONG Belun organiza sorumutu ba Re-ativa Rede Nasionál Prevensaun Konflitu (RNPK). Partisipa enkontru ne’e, mai husi entidades oioin hanesan PNTL, JPIC-OIPAS, CNJTL, SEJD, DNTP, MJM-TL, ARTE RITUAIS 77, PRADET, PSHT-TL, AJAR no estudante UNDIL hamutuk ema na’in 45.

 Iha abertura, Diretór Jerál Sekretáriu Estadu Protesaun Sivil (SEPS) Ismael Babo husu ba ekipa Centro Nacional Chega.I.P, Diresaun Nasionál Prevensaun Konflitu Komunitária (DNPKK), g7+ no Belun ne’ebé inisia re-ativa Rede Nasionál Prevensaun Konflitu (RNPK) tenke komunga interese nasionál.

Ismail afirma, tinan ida ne’e (2022) no tinan oin (2023) nu’udar tinan polítiku. Povu Timor-Leste sei partisipa festa demokrasia iha eleisaun prezidensiál no eleisaun parlamentár. RNPK tenke servisu hamutuk ho entidade relevante sira, hases tiha kór partidu, arte marsiál no étniku, tenke halo asaun prevensaun tanba ita hakarak iha rede ida profesionál no komunga interese nasionál ne’ebé garante paz no estabilidade.

 “Rede ne’e importante tebes. Rede ne’e sai hanesan xave, sasukat ba estabilidade pais ida ne’e. iha esperiensia tinan hirak liu ba rede ne’e ativu tebes, kontribui makaas ba paz no estabilidade Timor-Leste”, dehan Ismael iha diskursu abertura enkontru ne’ebé hala’o iha Salaun Konferénsia Centro Chega! Antigo Comarca Balide, Dili, Kuarta-feira (23/02/2022).

Nia haktuir, problema ne’ebé iha sai ita nia responsabilidade, ita tenke servisu hamutuk tantu instituisaun governu no mos organizasaun sosiedade sivil, atu alkansa objetivu ida de’it atu garantia paz no estabilidade.

“Importante liu mak ita halo koordenasaun ne’ebé kapas, komunikasaun ne’ebé kapas iha metodolojia ida de’it ba prevensaun konflitu tanba prevensaun konflitu komunitária. Ita tenke muda estratejia husi rezolusaun ba prevensaun signifika ita prevene duke kura”, Doretór Jerál ne’e informa.

Nia mos lori governu liu-liu Ministériu Interior no Sekretariu Estadu Protesaun Sivíl nia naran hato’o agradese wain ba organizasaun g7+ tanba bele fahe esperiensia Timor-Leste ba mundu internasionál. Agradese mós ba Centro Chega! tanba fahe ona esperiénsia pasadu no ita kompleta malu ba prevensaun konflitu.

Iha fatin hanesan, Diretór Ezekutivu Centro Nacional Chega!I.P, Hugo Maria Fernandes dehan, rede ida ne’e sei hala’o papel importante tolu (3); – Ida halo monitorizasaun nivél komunidade saida mak akontese iha ne’ebá. Husi monitoirzasaun ne’e mak sei hato’o ba Rede sa medidas mak atu foti. – Rua halo estudu katak rede ne’e sei halo estudu ba potensia konflitu iha komunidade. Ezemplu konflitu entre arte marsiais, konflitu rai no konflitu fetosan no umane. – Tolu halo asaun.

“Centro Chega! iha tinan kotuk ita halo rekonsiliasaun iha nivél komunidade entre funu maun alin ne’ebé uluk konflitu ba malu depois liu tiha tinan 47, sira dehan ami presiza tuur hamutuk rezolve, ami prontu halo rekonsiliasaun. Ida ne’e mak ita halo”, Hugo rekoñese.

Nune’e, mos Sekretariu Jerál g7+, Helder da Costa konsidera, rede ida ne’e importante atu bele monitoriza konflitu sira ne’ebé akontese iha komunidade nia leet hodi buka hatene kauza husi konflitu no foti medidas rezolve.

Tanba Timor-Leste nu’udar nasaun foun ida, naran ohin loron morin iha nivél internasionál tanba hakuak paz, tanba ne’e, ita tenke hadomi paz hadomi trankuilidade hadomi dezenvolvimentu. Mai ita hamutuk kria paz hakmatek iha rai laran.

Media Chega!