Dili – (13 Fevereiru 2026), Centro Nacional Chega!I.P servisu hamutuk ho Instituto Superior de Cristal (ISC) hala’o diskusaun regular ho tema “Relatório Chega! Capítulo V Resistência: “Estrutura e Estratégia”. Oradór ba diskusaun ne’e mak, Nugroho katjasungkana nu’udar Ativista no Peskizadór ne’ebé ko’alia kona-ba Relatório Chega! Capítulo V “Resistência: Estrutura e Estratégia” no Josefina Moniz nu’udar membru Organizasaun Popular da Mulher Timor (OPMT) iha luta libertasaun ukun rasik-an ne’ebé ko’alia kona-ba Analiza kritika: saida mak sai di’ak no saida mak sai limitasaun ba Forsa no Frakeza Estrutura Rezisténsia. Diskusaun ne’e partisipa husi Estudante ISC, Fakuldade Ciência da Saúde hamutuk na’in 62.
Prezidente Exekutivu Fundação Cristal, Agostinho dos Santos Gonçalves hateten, relatório Chega! nu’udar dokumentus importante tanba ko’alia kona-ba istória passadu luta povu Timor-Leste nian ba ukun rasik-an.
Prezidente haktuir, relatóriu Chega! la’os ko’alia de’it kona-ba Timor-Leste nia istória passadu maibé ko’alia mos kona-ba Timor-Leste nia futuru tanba ne’e ISC prontu halo kooperasaun servisu ho Centro Chega!I.P atu kontinua halo atividade hanesan iha ISC.
“Relatório Chega! mak dokumentus importante liu ba Timor-Leste la’os deit haree ba passadu maibé mos haree ba futuru Timor nian, nune’e diskusaun ne’e lori estudante sira ba kompriende no hatene ba liafuan Chega! ka to’o ona ba violensia, sofrimentu, injustisa hodi moris iha haksolok no dame”, Prezidente Exekutivu esplika.
Iha oportunidade hanesan, Reitór Instituto Superior Cristal, Sebastião Pereira esplika, atividade ida ne’e nu’udar meiu ida lori estudante ba komprende istória mak akontese ona, nune’e husi parte eskola nafatin kolabora hodi realiza atividade edukativa sira ne’e.
Diretór Divizaun Edukasaun no Formasaun (DEF), Alexandre Ornay Pinto dehan, diskusaun regular nu’udar espasu ida lori estudante sira ba aprende istória passadu mak hakerek ona iha Relatório Chega! atu estudante sira iha kuriozidade ba aprende istória Timor nian.
Estudante ISC, Estefania Ximenes hato’o sentimentu kontente tanba bele partisipa iha atividade diskusaun regular Relatório Chega! atu bele aprende kona-ba istória Timor-Leste nian ba prosesu luta ba ukun rasik-an.
Nune’e mos, estudante Baltazar dehan, atividade diskusaun regular Relatório Chega! importante tanba bele rona direita husi oradór no oradóra sira ne’ebé involve iha prosesu luta ba independensia.
Entertantu, atividade diskusaun regular Relatório Chega! ne’ebé hala’o iha kampus ISC la’o ho di’ak hetan partisipasaun maximu husi estudante sira.
Media Chega!.
