Director Executivo Centro Nacional Chega!I.P, Hugo Maria Fernandes iha kontestu prevensaun ba pandemia COVID-19, ofisialmente toma desizaun hodi aplika medida physical distancing ho maneira limita oras servisus funsionariu sira atraves sistema rotativu, suspende atividades mak involve ema barak no resintus Centro Chega! la asesivel ba publiku.
Desizaun neé hasai liu hosi Memo ho Nu. 03/MEM/DE/CNC/III/2020, datada 24 Marco no vigor ate dia 31 Marco 2020 ho probabilidade ba renovasaun, hafoin halao enkontru ho dirijentis Centro Chega! sira seluk iha Tersa-feira (24/03/2020) semana neé, iha Balide, Dili.
Ba chega.tl Hugo Maria Fernandes informa katak desizaun ida neé foti hodi prevene pandemia COVID-19 mak sirkula ona iha nasaun barak, inklui Timor-Leste neébe afetadu nain ida, haktuir ba deklarasaun hosi Ministeriu Saude iha loron 21 Marco 2020 foin lalais neé.
Desizaun ida neé mos bazeia ba orientasaun husi S.E. Primeiru Ministru Taur Matan Ruak, ne’ebe fo sai hafoin reniaun Konsellu Ministru iha Sentru Konvensaun Dili, iha loron 23 Marco 2020, hodi fo orientasaun ba Membrus Governu no insitituisaun Estadu sira hodi orienta ona funsionariu hirak ne’ebe hala’o servisu ladun essensial atu deskansa iha uma, Hugo hatutan.
Alem de neé, liu hosi memo refere Director Executivo husu ba funsionariu hirak neébe hela iha uma atu la halo viajens fora hosi Dili, hirak neébe tama servisus hapara utilizasaun makina fingerprint hodi rejista sira nia prezensa, no sei fasilita mos koneksaun internet ba funsionariu sira hodi halao komunikasaun no koordenasaun servisus iha qualker tempu no hosi fatin neébe deit.
Nuneé mos Hugo Maria Fernandes husu ba funsionarius Centro Chega! wainhira halao servisus deve ser ho distansia (dok malu), fase liman bebeik no hamenus movimentu ba fatin publiku.* (Luis Garcia dos Santos | Voluntáriu iha Centro Chega! | 24.03.2020).
