Dili – Diretór Ezekutivu Centro Nacional Chega!I.P Hugo Maria Fernandes informa, Lansamentu Plaka memórial Rua Liberdade Imprensa ho tema “Sinalizasaun no Re-Estensaun Avenida Liberdade Imprensa”, ne’ebé Centro Nacional Chega!I.P no Conselho Imprensa Timor-Leste (CI) hala’o, nu’udar aktu rekoñesimentu no dignifika jornalista sira nia kontribuisaun ba luta ukun rasik-an.
“Lansamentu Plaka Memoriál Rua Liberdade Imprensa nu’udar aktu hanoin hikas, fó rekoñesimentu no dignifika jornalista sira ne’ebé mate nu’udar kontribuisaun ida ba iha prosesu luta ba ukun rasik-an”, dehan Diretór Ezekutivu Centro Chega! iha diskursu iha serimonia lansamentu Plaka Memoriál Rua Liberdade Imprensa ne’ebé hala’o iha Rotunda Eis Prezidente RDTL, Francisco Xavier do Amaral, Merkadu Lama, Dili, Tersa-feira (21/09/2021).
Hugo haktuir, memorializasaun iha kontextu ohin loron nian ita fahe ba buat rua, ida memorializasaun nu’udar aktu ida atu hanoin hikas, fo rekoñesimentu, no mós dignifika ema sira ne’ebé mak kontribui ba iha prosesu ida ukun rasik-an.
Prosesu luta ba ukun rasik-an jornalista sira nia kontribuisaun importante tanba liu husi jornalista sira nia servisu, foti informasaun kona-ba akontesimentu sira ne’ebé akontese iha rai laran hodi fó sai ba komunidade internasionál hodi hatene, tanba ne’e servisu sira ne’ebé jornalista sira halo ne’e importante no tenke valoriza, dignifika no fó rekoñesimentu liu husi memorializasaun.
Konseitu memorializasaun tuir termu direitu nian, depois póz-konflitu ninia kontextu mak justisa tranzitóriu. Justisa tranzitóriu ne’e iha komponente ida mak reparasaun. Memorializasaun liu husi aktu monta plaka hanaran rua avenida sira ne’e parte ida husi reparasaun bainhira estadu no governu laiha kbiit atu kompensa vitima sira. Aktu sira hanesan ne’e nudar aktu reparasaun.
Diretór Centro Chega! hatutan, ko’alia kona-ba asuntu direitus umanus ne’e, ba ita ema tantu individu no grupu no mós ba sosiedade ne’e iha rua, Ida sosiedade jornalista ne’ebé mak mate, ita halo memórializasaun ba sira, ba sira nia sakrifisiu, komprimisu tomak no persistente tomak ba fiar ida Timor nian. Rua ita hato’o solidariedade ba sira nia maluk ne’ebé husik hela.
Entretantu, Prezidente Conselho Imprensa Timor-Leste (CI) Virgilho Guterres esplika, espasu ida ne’ebé tau plaka memoriál Rua Liberdade Imprensa ne’e hanesan dalan ida ba memorializasaun jornalista sira ne’ebé uluk fó sira nia kontribuisaun ba ukun rasik-an.
Tanba ne’e, sinalizasaun plaka memoriál Rua Liberdade Imprensa ne’e importante tebes fó valorizasaun ba jornalista sira ne’ebé mate tanba husi sira nia kontribuisaun mak ohin loron Timor-Leste sai nasaun ida livre no independente.
“Atividade jornalizmu ou liberdade imprensa ne’e xave ba ita nia luta desde uluk kedas no mós kontinua sai xave ka fatór determinante ba dezenvolvimentu ita nia sosiedade ne’ebé demokratika, ita sei kontinua luta nafatin”, Prezidente CI garante.
Eis Prezidente Repúblika Timor-Leste, Jose Ramos Horta rekoñese katak media nia kontribuisaun ba prosesu luta ukun rasik-an importante tebes tanba liu husi media mak bele fó sai informasaun ba mundu internasionál hodi mundu internasionál fó atensaun ba Timor-Leste nia auto determinasaun.
Iha tempu hanesan, Diretór Ezekutivu Conselho Imprensa Timor-Leste Rigoberto Monteiro agradese ba UNESCO ba apoiu ne’ebé fó ba CI hanesan parseria importante desde inisiu CI hamriik no agardese mós ba Centro Chega! hodi halo parseria ho CI, hodi halo sinalizasaun ba fatin sira ne’ebé refleta ba jornalista sira no mós sempre halo kampaña kona-ba loron liberdade imprensa Timor-Leste.
Serimonia lansamentu Plaka Memoriál Rua Liberdade Imprensa hetan partisipasaun husi orgaun komunikasaun sosiál, nain ba media, estudante Departamentu Komunikasaun Sosial husi Universidade Nacional Timor-Lorosa’e (UNTL).
Hafoin remata lansamentu Plaka Memoriál Rua Liberdade Imprensa, kontinua kedas ho long march hahú husi Rotunda Merkadu Lama to’o iha Terminal Becora hodi karii ai-funan no sunu lilin.
