Iha loron 10 fulan juñu tinan 1980, forsa Falintil husi seitór Fronteira Norte no sentru Súl no membru rede klandestina sira iha Díli halo atentadu ba sede Forsa Indonézia nian iha Retransmissor TVRI Marabia no mos atentadu ba Paiol Quartel kompi B bataliaun 744 iha Bekora hodi hadau armas forsa bataliaun 744 no tiru mate Militar Indonézia lubuk ida.
Atentadu ne’e ho objetivu atu hatudu ba komunidade internasionál katak luta povu Timor ba auto determinasaun sei eziste. (atentadu ne’e Falintil sira hanaran ho levantamentu Marabia). Liu tiha atentadu Forsa Indonézia halo operasaun bo´ot ida hodi kaptura no oho komunidade ne’ebé sira deskonfia nomos membru rede klandestina sira no forsa falintil sira ne’ebé involve direita iha levantamentu ne’e. Tuir informasaun ne’ebé sasin sira fó iha operasaun ne’e Forsa Indonézia oho ema 120, iha primeiru operasaun TNI nian ba levantamentu Marabia kaer (Kaptura) ema nain 600 lori hotu familia husi ema sira ne’ebé involve iha levantamentu ne’e hodi ba kastigu iha ilha Ataúru.
