(Hakerek nain: EFREM DOS ANJOS, Sobrevivente 12 Novembru – Juventude Lorico Asuwa’in).
Hakarak lembra asuwa’in balun ne’ebé ha’u hatene, maibé liu tiha masakre ha’u nunka hasoru sira fali to’o ohin loron.
Masakre St. Cruz 1991, tempu ne’ebá ha’u SMP klas 2 atu ba 3 iha Eskola São Jose Balide. Ema ida ne’ebé ha’u nunka haluha mak ha’u nia mestre naran Domingos Segurado, ha’u lembra nia hatete buat rua, 1. “Sei iha buat ruma”, ha’u la hatene nia ko’alia ne’e intensaun saida, maibé ha’u kumpri de’it nia liafuan, nia hameno tan liafuan ida seluk 2. “mai eskola keta haluhan hatais kamiza laran”.
Tempu ne’ebá ha’u hela iha Aituri-Laran, ha’u prepara atu mai eskola, ha’u haree maun balun ne’ebé hela besik ami, sira ema Lospalos eskola iha SMA St. Yosep, nain ida ha’u hatene nia, maun ne’e naran Venancio, sira sai nakukun ho farda atu ba eskola, ha’u mos haree sira nain hira ne’e hatais kamiza laran.
Infelismente ha’u la ba tuir misa iha Motael, maibé ami ba halimar de’it iha eskola Balide, kolega sira bisu bisu ba malu la hatene ko’alia saida, derepente kolega balun konvida ami atu ba tuur halimar iha portaun besik Gruta Nossa Senhora, Agora Seminario.
Lakleur ami rona ema hakilar, ami hotu sai ba hamrik iha eskola oin, ami haree kolega barak SMP São Jose mak iha laran, ami mos hahú tama barisan ikus liu, ha’u haree Maun Venancio mos iha kotuk, ha’u nia liafuan musan ida de’it mak sai hosi ha’u nia ibun “Viva”.
No ba to’o iha semitériu ha’u hamriik besik Warung Bubur, seguranca manifestasaun nian haruka ami tama, maibé lakleur ha’u haree tentara sira no policia sira halai mai, ha’u halai tama iha warung bubur nia laran, ha’u konsege haree maun Venancio dudu malu ho policia, liu minutu balun de’it hahú ona tiru. Ha’u halai sai hosi warung bubur no ba to’o iha My Friend. Ha’u hetan Maun Altur no survivientes sira seluk hamriik iha My Friend hateke tuun ba rate.
Sira barak ha’u hasoru fali, maibé mestri Domingos Sigurado ho maun Venancio hahú hosi Masakre 12 Novembro 1991 mai to’o ohin loron, ha’u nunka hetan no haree sira nia oin. Sira iha ne’ebé? perguntas boot ida ne’ebé to’o ohin ha’u sei hanoin.
