Dili – (18 Setembru 2024), Centro Nacional Chega! Instituto Publiku (CNC I.P) servisu hamutuk ho hamutuk ho organizasaun sosiedade sivíl nasional no internasional halo lansamentu ba rede Globál ba Prevensaun Konflitu Armadu (GPPAC) Timor-Leste, ne’ebé realiza iha Salaun Konferensia Centro Chega! Antigo Comarca Balide.
Rede GPPAC Timor-Leste lansa ho objetivu atu servisu hamutuk ativamente atu prevene konflitu violentu no harii sosiedade ida ne’ebé pasífika liu. Objetivu seluk husi lansamentu rede ne’e mak atu formula no konsolidasaun rede nasionál, atu bele ajuda malu iha rede GPPAC nia laran. Objetivu seluk tan mak, atu hametin no haforsa kapasidade rede GPPAC nian atu bele aprende ba malu no dezenvolve solusaun sira ne’ebé lidera husi komunidade ba injustisa no inseguransa.
Rede Globál ba Prevensaun Konflitu Armadu (GPPAC) Timor-Leste nu’udar rede globál ida-ne’ebé lidera husi organizasaun sosiedade sivíl (CSOs). Rede ne’e kompostu husi rede rejionál hamutuk 15, ho prioridade no ajenda espesífiku ba sira-nia ambiente. Iha Sudeste Aziatiku, GPPAC iha membru organizasaun naun-governamental 40+ no kolabora ho grupu sosiedade sivíl sira seluk ne’ebé relasiona ho pás no direitus umanus. Inisiativa ba Dialogu Internasional (IID), ne’ebé koloka iha Filipina, sai hanesan sekretariadu rejionál GPPAC Sudeste Aziatiku.
GPPAC Sudeste Aziatiku lidera husi Grupu Komité Rejional (RSG), kompostu husi pontu fokál nasaun (hanesan Malázia, Indonezia, Myanmar) no pontu fokál sub-nasionál iha área sira ne’ebé iha konflitu pasadu ka kontinua (hanesan Aceh, Mindanao, Papua Osidental, Deep South Thailand). Nu’udar membru RSG, pontu fokál ida-idak konvoka ninia rede nasionál no sub-nasionál no liga membru sira ho rede globál GPPAC nian. Maske servisu barak husi GPPAC to’o agora depende ba kapasidade konvoka pontu fokál sira hanesan membru RSG, membru RSG barak reflete ona nesesidade atu enerjia sira-nia nasaun no rede sub-nasionál GPPAC nian atu nune’e ita bele maximiza aprendizajen koletiva, troka, fahe solidariedade, no harii movimentu iha Sudeste Aziatiku.
Timor-Leste sai ona belun ho GPPAC dezde 2005 no kontribui ativamente ba troka, aprendizajen koletiva ho esperiénsia fundamentál sira iha prosesu rekonsiliasaun no pás. Hodi lori rede harii dame iha Timor-Leste ne’ebé oin-oin no proativu, fundasaun ba adezaun ba rede nasionál Timor-Leste nian ba GPPAC sei lori ba objetivu sira atu hasa’e parseria ida ba prosesu pás ne’ebé inkluzivu liu, harii solidariedade no polítika sira ne’ebé bazeia ba seguransa umana.
Enkuantu, lansamentu rede GPPAC ne’e partisipa husi reprezentasaun governu nian, Organizasaun Sosiedade Sivil (OSS), akadémiku no membru GPPAC.
