(Dili, 04 Marsu 2024) – Centro Nacional Chega!I.P liu husi Divizaun Peskiza no Arkivu Istoriku (DPAI) fo formasaun ba Jestór Museu Memórial Munisipiu (MMM) 4 mak hanesan, Museu Memórial Munisipiu Aileu (MMMA), Museu Memórial Munisipiu Viqueque (MMMV), Museu Memórial Munisipiu Covalima (MMMC) no Museu Memórial Munisipiu Bobonaro (MMMB) hamutuk ema na’in 8. Tema ba formasaun ne’e mak “Jestaun Museu”, durante loron 4 hahú husi (04-08 Marsu), realiza iha Salaun Konferensia Centro Nacional Chega!I.P, Antigo Comarca Balide-Dili.
Objetivu Prinsipal husi formasaun ne’e mak atu hasa’e sira nia koñesementu no abilidade kona-ba dokumentasaun memória istorika, prezervasaun dokumentu istoriku no Tour Guide. Formasaun ne’e halo atu responde ba objetivu estabelesementu Museu Memórial Munisipiu mak, atu disponibiliza no prezerva dokumentu istorika violasaun direitu umanu periodu1974-1999. Atu fasilita informasaun kona-ba istória pasadu ba publiku liu-liu istória komunidade munisipiu nian. Atu sai sentru aprendizajen kona-ba paz, justisa no direitu umanu. Atu referensia istorika ba peskizadór sira. No mos nu’udar espasu reflesaun kona-ba memória pasadu.
Alende ne’e, formasaun ne’e mos atu responde ba servisu Jestór Museu Memórial Munisipiu 4 nian mak halo dokumentasaun ba memória istorika sira, prezerva no disemina informasaun kona-ba memória pasadu ba publiku hodi hamosu komprensaun komun oinsá utiliza memória istorika nu’udar lisaun aprendisajen atu la repete fila-fali violensia pasadu nian.
Nune’e, formasaun ba Jestór Museu Memórial Munisipiu 4 hanesan parte importante ida ba responsabiliza Centro Chegall.P nian mak halo akompañamentu ba Jestór Museu durante tinan 2 hodi integra iha estrutura munisipiu, antes atu realiza integrasaun ida ne’e, presiza haforsa koñesementu no abilidade sira liga ba responsabilidade ne’ebé mak Jestór sira asumi.
Centro Chega! iha tinan 2021 to’o 2023, estabalese ona muzeu Memórial haat hanesan plataforma ida husi programa memorializasaun integradu ne’ebé ho objetivu final atu larepete violensia pasadu nian ho mekanizmu sira, atu harii plataforma ba ema no komunidade hosi parte étniku-kulturál no politika sira atu fahe sira nia istória no envolve komunidade iha dialogu no memoriaiizasaun, atu rezerva memoria istoriku liuhusi arkiva no disemina narrativa sira ba publiku, atu fasilita prosesu komprensaun kona-ba politika no programa sira oinsá mak utiliza memoria istoriku sira.
Enkuantu, Centro Nacional Chega!I.P hamri’ik nu’udar institutu públiku ida ne’ebé estabelese ho dekretu Lei no. 48/2016. Centro Chega! nia vizaun mak: “Sosiedade ida ne’ebé inkluzivu, la repete istória passadu nian, moris iha dame, no respeitu ba direitus umanu”. Centro Chega! nia misaun mak: “Harii sentru Pós-konflitu ne’ebé prezerva memória passadu nian hodi promove direitus no valór umanu, harii parseria nasionál no internasionál hodi reforsa rede servisu sira atu implementa rekomendasaun sira husi Relatóriu Final Comissão de Acolhimento, Verdade e Reconciliação (CAVR)-Chega! No Comissão da Verdade e Amizade (CVA) – Per Memoriam Ad Spem, sira ne’ebé relevante”.
(Media-CNC)
