Liquiça – (05 Abril 2025), Centro Nacional Chega!I.P hamutuk ho Komisaun Organizadora Komemorasaun Masakre Igreza Liquiça, Autoridade Munisipiu ho vitima no sobrevivente no mos komunidade sira komemora Masakre 6 Abril 1999 ba dala-26 ho tema “Memorializasaun Nu’udar Dalan ba Dame hodi Valoriza no Dignifika Éroi da Pátria”. Komemorasaun ne’e hala’o ho misa no kari aifunan hodi valoriza no dignifika éroi da pátria sira.
Misa hala’o iha Igreza São Jõao de Brito Liquiça, Prezide husi Pe. Francisco Barreto iha nia omilia hateten, ita ema idak-idak iha ninia istória rasik. Ba sira ne’ebé mate iha Igreza Liquiça tanba defende lia loos. Sira nia mate mak ohin loron ita hetan ukun rasik-an. Sira nia istória jerasaun foun sira presiza aprende atu bele hatene tanba ukun rasik-an ne’e la’os ema entrega de’it mai ita maibé sosa ho mate.
“Ita relembra fila fali, hanoin fila fali masakre ida ne’e, ita matan been sulin. Ema hirak mate iha 1999. Istoria ida ne’e jerasaun foun sira tenke hatene hodi hanoin katak ukun-an ne’e la’os ema fo de’it mai ita iha bandeza”, dehan Pe. Francisco iha nia omilia.
Nia afirma, jerasaun foun sira labele kontente de’it ho ukun-an ne’ebé hetan ona, maibé tenke aprende husi sira istória pasadu, prepara-an agora, planu ba futuru, oinsa mak lori rai ne’e ba oin liu husi dezenvolvimentu nasional. Hirak ne’e hotu tanba ita fiar metin ba maromak tanba maromak fo forsa mai ita fo dalan mai ita la’o ba oin.
Masakre Liquiça rezulta ema barak mate, kanek no balun lakon to’o agora seidauk hatene sira nia paradeiru. Sira ne’ebé mate, sira ne’ebé moris ne’e atu ita goja mais ita mos tenke reflete labele goja leet de’it maibé ho konsiensia iha direitu tomak atu goja maibé oinsa mak hadia rai ida ne’e fo kontribuisaun atu hadia didi’ak rai ida ne’e labele husik hanesan ne’e.
Nia mos husu ba Liquiçaoan sira, tempu ona atu halakon idak-idak nia egoismu, labele gosta hatun malu no hanoin de’it ba ninia-an. Tenke servisu hamutuk, fo liman ba malu hodi hadi’a rai no povu ida ne’e liu husi dezenvolvimentu nasional.
Hafoin remata misa kontinua ba kari aifunan iha Rezidensia Paroquia Liquiça, Jardin Erois da Patria Liquiça no Fatin Lagoa Masin Maubara ne’ebé uluk Milisia Besi Merah Putih (BMP) hamutuk ho Polisia (POLRI) no Militar Indonesia (TNI) oho no soe ba. Enkuantu, tema ba komemorasaun mak “Memorializasaun Nu’udar Dalan ba Dame hodi Valoriza no Dignifika Heroi da Pátria”.
Media Centro Chega!.
