Ainaro – (20 Juñu 2026), Centro Nacional Chega!I.P hamutuk ho Grupu Traballu Prosesu Rekonsiliasaun Timoroan (GT-PRT) fasilita Diálogu Ba Dame entre komunidade Suku Mauchiga no Suku Mulo (Dare), Postu Administrativu Hatubuiliku, Munisipiu Ainaro. Diálogu Ba Dame ne’ebé hala’o iha Kampu Dare, hahu ho serimonia kultural matak malirin hodi hatur ukun no bandu husi llia-na’in sira tuir lisan Hatobuilico, atu hakotu problema disintendementu, deskonfiansa no reklamasaun ba malu kona-ba partisipasaun komunidade nian ba levantamentu 20 Agostu 1982.

Tuir deklarasaun ne’ebé hato’o husi lia-na’in, sasin sira no representante komunidade sira iha Diálogu Ba Dame katak levantamentu 20 Agostu 1982 ne’e levantamentu Mauchiga – Dare la’os levantamentu Dare-Mauchiga tanba planu ba levantamentu 20 Agostu 1982 halo iha Mauchiga no implementasaun levantamentu 20 Agostu 1982 liuhusi asaltu ba Kuartel Militar Indonézia nian hala’o iha Dare.

Ekipa Painél Diálogu Ba Dame rona tiha deklarasaun husi lia-na’in sira, sasin sira no mos representante komunidade sira kona-ba ba levantamentu 20 Agostu 1982 hanaran levantamentu Mauchiga – Dare, mak ekipa Painél kria akta ida ho naran akta konkordansia hametin matak malirin no harmonizasaun istória entre komunidade Suku Mauchiga ho komunidade Suku Mulo-Dare, Postu Administrativu Hatubuiliku, Munisípiu Ainaro, hodi asina no orgaun estadu sira asina no mos sai sasin ba akordu ne’e.

Orgaun estadu liuhusi instituisaun sira ne’ebé marka prezensa hodi asina no sai sasin ba Diálogu ba Dame mak hanesan, Prezidensia Republika reprezenta husi Alexandrino Xavier de Araújo, Prezidente Parlamentu Nasional (PPN) no Prezidente Komisaun A ne’ebé trata asuntu justisa no konstitusionais, reprezenta husi, deputadu, António Verdial de Sousa Gama, Ministru Asuntu Kombatente Libertasaun Nacional (MKLN), Gill da Costa Monteiro “Oan Soru”, Prezidente Konsellu Kombatente Libertasaun Nasional (CCLN), Vidal de Jesus “Riak Leman” reprezentante sira husi Ministeriu Interior (MI), Ministeriu Administrasaun Estatal (MAE), Konsellu Imprensa (KI), Prezidente Autoridade Munsipiu Ainaro, Manuela Georgina Carmo B. Cortereal no entidade sira seluk mos asina no sai sasin ba akordu ne’e.

Medida reparativa ne’ebe sita iha akordu dame mak atensaun estadu nian ba komunidade Mauchiga no Dare mak hanesan, harii memórial ho naran ne’ebé parte rua konkorda ona ‘Memoriál Levantamentu Mauchiga – Dare – 20 Agostu 1982, Harii memórial iha fatin akontesimentu sira liga ho levantamentu 20 Agustu 1982, Hakerek istória liuhusi peskiza ne’ebé klean kona-ba levantamentu 20 Agustu 1982 Mauchiga – Dare, Mulo, Harii Muzeu Memórial Munisipal iha Ainaro hodi rekolla no preserva istória pasadu, Komemorasaun loron levantamentu Mauchiga-Dare sei hala’o hamutuk rotativamente entre komunidade rua ne’e (tinan ida komemora iha Mauchiga no tinan tuir mai iha Dare, Mulo), Molok komemorasaun levantamentu 20 Agostu sei harii komisaun organizadora konjunta, Estadu no Governu tenki tau matan ba vítima no sobrevivente sira.

Entertantu, atividade Diálogu Ba Dame taka ho misa agradesimentu prezide husi Pe. Paroquia Hatobuiliku, Francisco Soares Fernandes no komprimenta malu nu’udar agradesimentu ba susesu atividade refere.

Media Chega!.