Dr. Aniceto Guro Berteni Neves L.CG, MAPS moris iha Hatoudo, loron 12 Agusto 1973. Dr. Aniceto remata estudu Lisensiatura (S1) área Siénsia Polítika iha Universidade Nacional Timor-Lorosa’e (UNTL). Hafoin remata kontinua estudu ba Mestradu no remata iha área Master of Arts in Peace Study (MAPS) iha Universitas Kristen Duta Wacana (UKDW) Yogyakarta, Indonesia. No kontinua tan nia estudu no konklui Doutoramentu (Ph.D.) iha área Estudu Dezenvolvimentu iha Fakuldade Interdisiplinár iha Universitas Kristen Satya Wacana (UKSW) Salatiga, Indonesia.
Dr. Aniceto iha esperensia servisu nu’udar Dosente Seniór no Peskizadór ba área Espesializa iha Istória, Lei Direitus Umanus Internasionál, Harii Dame no Transformasaun Konflitu. Dr. Aniceto agora dadauk hala’o knar hanorin, halo peskiza, iha programa lisensiatura no pós-graduasaun iha Departementu Dezenvolvimentu Komunitária, Fakuldade Siensia Sosiais (FSS)-UNTL. Dr. Aniceto mos nu’udar Dosente ne’ebé hanorin materia istória iha Instituto Filozófia no Teolójiku (ISFIT) iha tinan 2023-2024.
Dr. Aniceto nu’udar formadór ba professor-sira hanorin materia Istoria, Direitus Humanus, Harii Dame no transformasaun konflitu iha Universidade sira liuhusi programa kooperasaun entre Centro Chega!I.P ho Ministeriu Ensinu Superior, Siensia no Kultura (MESSK) iha tinan 2024.
Dr. Aniceto nu’udar membru Grupu Traballu Tekniku (Diretóriu Revizór) iha Comite Orientador-25 (CO25), ne’ebé halo peskiza, publika hodi prezerva istória luta ba ukun rasik-an Timor-Leste nian. Iha tinan 2017, Dr. Aniceto hetan prestizu hodi simu prémiu ida husi Prezidente Repúblika Timor-Leste, Sr. Taur Matan Ruak. Iha tinan 2019 to’o Dezembru 2023, Dr. Aniceto hetan fiar nu’udar Konsultór Profisionál ba Gender Social Inclusion (GSI) and Social Behavioral Change (SBC) for the Millennium Challenges Corporation’s international cooperation program entre Estadus Unidus no Timor-Leste.
Ho koñesimentu akademiku no esperensia servisu ne’ebé iha, Dr. Aniceto iha obra oin-oin, nu’udar eskritór livru kona-ba Francisco Xavier do Amaral nu’udar Primeiru Prezidente Repúblika Demokrátika Timor-Leste. Iha livru ne’e, esplika Francisco Xavier do Amaral nu’udar figura importante ida iha Timor-Leste ne’ebé kulmina iha biografia no públika ona. Ba Obra ida ne’e, Autoridade Suku iha Postu Administrativu Turiskai, Munisipiu Manufahi fo naran Estrada ida ho titulu ‘Avenida do Aniceto Guro-Berteni Neves’. Dr. Aniceto nu’udar eskritór kona-ba Manual Métodu Peskiza Istóriku Komunidade nian. Agora dadaun Dr. Aniceto Guro Berteni Neves L.CG, MAPS hetan fiar husi Governu nu’udar Membru Konsellu Administrasaun Centro Nacional Chega!I.P. Aumesmo tempu nu’udar mos membru Konsellu Geral ba Universidade Nasional Timor Lorosa’e (UNTL) ba periodu 2023-2027.
