Dili – (23 Fevereiru 2024), Centro Nacional Chega!I.P estabelese ona kooperasaun ho Asosiasaun Vitima Konflitu Polítika (AVKP) 1974-1999 hahú husi 2019 to’o 2024. Husi kooperasaun ne’e, Centro Chega! apoiu ona programa 8.
Kestaun ne’e hato’o husi Koodenadór Sekretariadu Nasional Asosiasaun Vitima Konflitu Polítika (AVKP) 1974-1999, Domingos P. de Araujo Moniz ba Media CNC iha enkontru anual ne’ebé organiza husi Asosiasaun Vitima, iha Salaun Asosiasaun HAK, Farol-Dili.
Koodenadór haktuir, Programa 8 mak hanesan, programa Uma Memória ba Esperansa (UmbE) ba sobrevivente mais vulneravel, programa apoiu umanitáriu ba sobrevivente mais vulneravel, programa apoiu pontual, programa apoiu konsulta saúde ba sobrevivente, programa apoiu bolsu estudu ba sobrevivente mais vulneravel nia oan, programa formasaun ba pontu fokál asosiasaun vitima, programa apoiu fortalesimentu sekretáriadu AVKP 1974-1999 no programa sosa produtu lokál sobrevivente.
Programa hirak ne’ebé Centro Chega! apoiu ba Asosiasaun Vitima la’o ho di’ak. Tan ne’e, Asosiasaun Vitima nafatin iha komitmentu atu kontinua servisu hamutuk ho Centro Nacional Chega!I.P hodi tau matan ba sobrevivente mais vulneravel.
Iha oportunidade hanesan, Diretór Ezekutivu Interino Centro Nacional Chega!I.P, Metodio Caetano Moniz informa iha enkontru anual ne’ebé organiza husi Asosiasaun Vitima katak, Centro Nacional Chega!I.P nafatin iha komitmentu atu servisu hamutuk ho Asosiasaun Vitima.
Tanba Centro Chega! hamri’ik nu’udar institutu públiku ida ne’ebé estabelese ho dekretu Lei numeru 48/2016. Centro Chega! nia vizaun mak: “Sosiedade ida ne’ebé inkluzivu, la repete istória passadu nian, moris iha dame, no respeitu ba direitus umanu”. Centro Chega! nia misaun mak: “Harii sentru Pós-konflitu ne’ebé prezerva memória passadu nian hodi promove direitus no valór umanu, harii parseria nasionál no internasionál hodi reforsa rede servisu sira atu implementa rekomendasaun sira husi Relatóriu Final Comissão de Acolhimento, Verdade e Reconciliação (CAVR)-Chega! No Comissão da Verdade e Amizade (CVA) – Per Memoriam Ad Spem, sira ne’ebé relevante”.
Apoiu Centro Chega! ba Asosiasaun Vitima bazeia ba dekretu Lei numeru 48/2016, ho misaun ida solidariedade ba sobrevivente mais vulneravel. Entaun, apoiu CNC ba Asosiasaun Vitima ne’e nu’udar misaun ida Centro Chega! nian.
Alende ho dekretu lei, iha mos konvensaun internasional husi Organizasaun Nasoes Unidas (ONU), iha tinan 2005 hasai rezolusaun kona-ba direitu ba reparasaun ba vitima. Entaun, bazeia ba instrumentu internasional ne’e mak Centro Chega! uza sai prinsipiu katak, se mak hetan sofrementu iha fiziku, mental, emosional, lakon ekonomia, lakon nia direitus fundamentais ida ne’e vitima. “O hetan torturasaun ne’e o vitima. O hetan ameasas ne’e o vitima”.
Tanba ne’e, direitus vitima asesu ba justisa no repasaun ne’e dever estadu nian katak estadu iha dever atu fo atensaun ba sira liu husi Centro Nacional Chega!I.P.
Nia argumenta, ita ko’alia kona-ba asesu justisa ne’e la’os responsabilidade ka papél Centro Chega! nian tanba Centro Chega! nia papel ne’e halai liu ba reparasaun (solidariedade ba sobrevivente) ne’e katak, oinsa apoiu vitima sira para moris dignu i hetan rekoñesimentu husi sosiedade.
Maibé esforsu ne’e la’os Centro Chega! mesak. Centro Chega! nu’udar instituisaun estadu servisu hamutuk ho organizasaun sosiedade sivil exemplu Asosisasaun Vitima Konflitu Polítika (AVKP) 1974-1999 no asosiasaun sira atu implementa.
Centro Chega! agradese ba AVKP 1974-1999 kontinua halo kooperasaun maske, tinan 2024 Governu alokasaun orsamentu ba Centro Chega! tun ba 8% maibé, ita nafatin ho programa ne’ebé mak iha, ita reduz de’it numeru atividade.
(Media CNC)
