Dili, (4 Setembru 2025) – Delegasaun OACPS-EU (Organisation of African, Caribbean and Pacific States)-(European Union) Joint Parliamentary Assembly hamutuk na’in 10, lideradu hosi Francisco Assis nu’udar (Chair), Dariusz Jonski (Vice Chair), Michal Wiezik (Vice Chair), Niels Hansen, Bogdan Zdrojewski, Sergio Humberto, Hannes Heide, Marit Maij, Klara Dostalova no Daniel Freund.
Delegasaun ne’e simu direita hosi Diretór Ezekutivu Centro Nacional Chega!I.P, Hugo Maria Fernandes ho ekipa, depois kontinua halo enkontru. Iha enkontru ne’e, Diretór Ezekutivu hato’o bemvindo ba delegasaun ne’ebé hala’o vizita dahuluk mai iha Chega! no introduz mandatu Centro Chega!I.P nian ligadu ba implementasaun rekomendasaun sira hosi relatóriu Chega! no PMAS. Alende ne’e, partilla informasaun kona-ba progresu servisu liu-liu asuntu reparasaun, edukasaun, memorializasaun no rekonsiliasaun.
Hafoin remata enkontru, delegasaun kontinua halo vizita ba Muzeu Chega! hodi haree exibisaun sira, istória narativu vitima no sobrevivente sira nian, haree grafiti no vizita sela nakukun ne’ebé iha iha tempu pasadu uza hodi halo detensaun, torturasaun no violasaun direitus umanus oin-oin ba Timoroan sira ne’ebé defende ukun rasik-an.
Hafoin remata vizita, Francisco Assis hato’o obrigado wain ba Centro Chega!I.P ho ekipa ne’ebé mak fahe ona informasaun no mos guía sira hodi vizita Muzeu Chega! haree istória Timor-Leste nian kona-ba prosesu luta ba ukun rasik-an.
Embaixadór Timor-Leste ba Uniaun Europeia, Jorge Trindade Neves de Camões esplika, delegasaun Uniaun Europeia halo vizita ba Muzeu Chega! atu bele hatene Timor-Leste nia istória kona-ba prosesu luta ba ukun rasik-an.
“Sira mai aprende istória ita nian, prosesu luta ba ukun-an ne’e. Sira uluk apoiu ita. Sira mai haree di’ak liu tan prosesu ne’e tomak, ne’ebé hasoru Diretór Chega! ninian esplika di’ak tebtebes sira hatene”, dehan Embaixadór.
Entertantu, vizita delegasaun Uniaun Europeia iha Muzeu Chega! hetan akompañamentu hosi Embaixadór Timor-Leste ba Uniaun Europeia, Jorge Camões ho ekipa hosi Ministeriu Negosiu Estranjeiru no Kooperasaun (MNEK).
Media Chega!.
