Dili – (24 Janeiru 2023), Centro Nacional Chega!I.P husu (rekomenda) Governu Timor-Leste liu hosi Ministériu Negosiu Estranjeiru no Kooperasaun (MNEK) ho Governu Indonézia liu hosi Ministériu Negosiu Estranjeiru (MNE) atu reativa hikas programa enkontru altu nivel-Senior Official Meeting (SOM).
Tánba programa SOM ne’e importánte tebes ba nasaun rua, Timor-Leste ho Indonézia oinsa mak parte rua hasoru malu halo diskusaun kona-ba asuntu ema lakon, tuir rekomendasaun hosi relatóriu Comição Acolhamento Verdade e Reconciliação (CAVR) no Comição Verdade e Amizade (CVA) per memória ad spem.
Kestaun ne’e hato’o hosi Diretór Exekutivu Centro Chega!I.P, Hugo Maria Fernandes iha enkontru bilateral entre Timor-Leste ho Indonézia ne’ebé organiza hosi Ministériu Negosiu Estranjeiru no Kooperasaun Timor-Leste no Ministériu Negosiu Estranjeiru Indonézia, ne’ebé hala’o iha iha salaun MNEK, Praia dos Coquiros-Dili.
Diretór argumenta, enkontru altu nivel SOM paradu iha tinan 2015 to’o ohin loron no seidauk hatene razaun saida mak programa ne’e paradu, tánba ne’e, governu Timor-Leste no Governu Indonézia tenke ho boavontade atu reativa fila fali.
“Husu atu MNEK no MNE reativa fali Senior Official Meeting (SOM) kona-ba Rekomendasaun CVA nian ne’ebé mak hahú hosi tinan 2015, la organiza hosi MNEK,” Diretór Chega! rekomenda.
Nia rekomenda tán, husu MNE Indonézia atu halo renovasaun ba mandatu, Eis-Prezidenti Indonézia, Susilo Bambang Yudhoyono nian atu implementa Rekomendasaun sira hosi relatóriu CVA nian ne’ebé kaduka iha tinan 2016. No mós dudu atu ratifikasaun konvensaun ema lakon forsada ne’ebé Indonézia asina tiha ona iha tinan 2010.
Centro Chega!I.P husu reprezentánte povu iha uma fukun Palamentu Nasionál (PN) atu halo ratifika ba konvensaun internasionál kona-ba halakon ema ho forsadamente tánba Governu Indonézia ratifika ona, maibé Timor-Leste seidauk.
Ho preokupasaun hirak ne’e, Direitor Jerál Asuntu Bilateral MNEK, Domingos Savio hamutuk ho Delegasaun Indonézia nian lidera hosi Diretór Jerál Asuntu Asia Pasifik no Afrika, Abdul Kadir Jailani no Embaixadór Indonézia mai Timor-Leste, Okto Dorinus Manik konsidera asuntu hirak ne’e importánte no ba oin sei tau atensaun.
Asuntu sira seluk ne’ebé mak diskute iha enkontru bilateral ne’e, mak kooperasaun entre Timor-Leste no Indonézia iha setór komersiu, industria, turismu, agrikultura, peskiza, defeza no seguransa, fronteira terestre no mós Rekomendasaun sira hosi relatóriu Comição Verdade e Amizade (CVA) entre Timor-Leste no Indonezia.
Partisipa hosi enkontru ne’e, delegasaun Timor-Leste kompostu hosi Diretór Jerál Turismu Komunitária no Kultural, Diretór Jerál Ministeriu Turismu Komersiu no Industria, Diretór Ezekutivu TradeInvest I.P, Diretór Jerál Ministeriu Defeza no mós Diretór Jerais no nasionál sira hosi MNEK.
Media Chega!.
