Dili – Diretór Ezekutivu Centro Nacional Chega!I.P, Hugo Maria Fernandes husu ba Kandidatu Prezidente Repúblika ba Eleisaun Prezidensiál (ElPrez) atu implementa rekomendasaun Chega! durante tempu kampaña.

Rekomendasaun husi Relatóriu Final Comissão de Acolhimento, Verdade e Reconciliação (CAVR)-Chega! ba kandidatu Prezidente Republika mak labele halo mobilizasaun militante no simpatizante ne’ebé barak no mós labele uza atributu organizasaun arte marsiál no atributu seluk tanba iha potensia hamósu konflitu.

“Aprende husi pasadu desde kedan husi 1974, Partidu Polítiku sira halo mobilizasaun. Tanba konflitu ne’e mósu la’os de’it uza atributu, maibé mobilizasaun. Lider sira labele kontrola iha potensia ba konflitu”, dehan Hugo ba jornalista sira iha salaun konferensia Centro Chega! Antigu Comarca Balide, Dili, Kuarta-feira (23/02/2022).

Hugo argumenta, tinan 5 ita sempre tuir eleisaun, antes eleisaun ita hahú uluk kampaña ba eleisaun nu’udar prosesu dezenvolvimentu demokratizasaun ida iha Timor-Leste, maibé tenke mantein paz no estabilidade.

Tinan 5 liu ba, iha eleisaun Prezidensiál, Centro Chega! kontribui mós rekomendasaun balun ba iha eleborasaun paktu nasionál ba eleisaun ne’ebé mak pasiva. “Ami hein tinan ida ne’e, CNE mós sei simu rekomendasaun balun husi Chega! para hamósu mós paktu unidade nasionál ba eleisaun pasiva ne’e”, nia garante.

Media Chega!