Dili, (14 Novembru 2024) – Centro Nacional Chega!I.P parseria ho Ministeriu Edukasaun (ME) organiza kompetisaun sertame nasional Istória, Direitus Umanus no Edukasaun Sidadania iha ambitu komemorasaun loron Proklamasaun Independénsia ba dala-49. Kompetisaun sertame nasional ne’e partisipa husi Eskola Sekundariu hamutuk 13 husi Munisipiu 10 mak hanesan, Eskola Sekundariu Jerál 02 Vila Nova Baucau, Eskola Sekundariu Katolika Nosa Senhora de Fatima Railako-Ermera, Eskola Sekundariu Jeral Olocassa Ossu-Viqueque, Eskola Sekundariu Publiku Nino Konis Santana Lospalos-Lautem, Eskola Sekundariu Cafe Manatuto, Eskola Sekundariu Cafe Dili, Eskola Sekundariu Cafe Likisa, Eskola Sekundariu Kristy Sword Gusmão Laleia-Manatuto, Eskola Sekundariu Jeral Hu Iso Lara Iso Maubara-Likisa, Eskola Sekundariu Jeral Nicolão Lobato Tasi Tolu-Dili, Eskola Sekundariu Jeral 5 de Maiu Becora-Dili, Eskola Sekundariu Jeral Malere-Aileu no Eskola Sekundariu Jeral Dom. Martinho Lopez Maliana-Bobonaro.
Iha abertura kompetisaun sertame nasional, Diretór Ezekutivu Centro Nacional Chega!I.P, Hugo Maria Fernandes husu ba Estudante Eskola Sekundariu sira ne’ebé partisipa iha kompetisaun sertame nasional atu aprende istória labele dekor ‘hafal’ de’it data istóriku, maibé tenke hatene razaun husi akontesimentu.
“Ba estudante sira aprende istória labele dekor deit data maibé tenke hatene razaun husi data akontesimentu ne’e. tanba ida ne’e sai memoria ida di’ak liu”, Diretór Ezekutivu Chega! hato’o iha diskursu serimonia abertura kompetisaun sertame nasional ba dala-5, ne’ebé realiza iha Salaun Konferensia Centro Chega! Antigu Comarca Balide-Dili.
Nia hatutan, sertame importante ba estudante sira, maibé aspeitu seluk ita tenke halo reforma ruma iha pergunta sira liu-liu perguntas ba alin Estudante Sekundariu sira la’os meramente atu dekor de’it data maibe tenke hatene razaun ruma husi eventu ida ne’ebé mak akontese.
Tanba ida ne’e mak sei fo ba imi memoria ida di’ak liu, nia fo exemplu, laos de’it dekor glope akontese bainhira? kontra golpe akontese bainhira? no loron proklamasaun independénsia unilateral Timor-Leste bainhira?, maibé tenke hatene mos razaun ruma husi akontesimentu ne’e
Ita hein katak ba tinan oin, Eskola Sekundariu iha mos pergunta sira ne’ebé mak iha aspeitu elaborativu oituan. Nia dehan “ita lakoi harii identidade ida ita nian hanesan disionariu ida ne’ebé mak la’o kamus hidup, maibé ita tenke iha nosaun ida kona-ba razaun ruma tanba sa mak tau data ruma iha ita nia istória”.
Reprezentante Ministra Edukasaun (ME), Deolindo da Cruz lori Ministeriu Edukasaun (ME) nia naran hato’o apresiasaun ba Centro Nacional Chega!I.P ba realizasaun atividade kompetisaun sertame nasional.
Diretór Jeral ne’e haktuir, atividade kompetisaun sertame nasional ne’e importante tebes ba estudante sira atu partisipa hodi hato’o sira nia koñesimentu liga ba materia istória ne’ebé sira aprende iha eskola. Nune’e, Ministeriu Edukasaun (ME) prontu servisu hamutuk hodi atinji objetivu.
“Apresia ba Chega!I.P ne’ebé mak realiza iha eventu ida ne’e, ami kontinua disponivel servisu hamutuk para ita nia obejtivu ne’e atinji ho di’ak, ita nia jerasaun sira tenke hatene ninia istória, ninia identidade rasik nu’udar mos nasaun sira seluk”, apresia Diretór.
Entertantu, kompetisaun sertame nasional ne’e realiza durante loron 2 (14-15 Novembru 2024). Kompetisaun sertame ne’e realiza hodi hatan ba knar Centro Chega! nian liu husi dekretu lei no. 48/2016 hateten, contribuir, no âmbito das suas competências, para a educação civica, formação e metodologias de ensino no que se refere à historia de Timor-Leste no periodo de 1974 e 1999 e aos direitos humanos, promover a continuidade da disseminação e socialização do relatório Chega! e outros istrumentos de divulgação produzidos pela CAVR e pela CVA.
(Media CNC)
