Dili, (20 Dezembru 2024) – Festivál Kultura Rezisténsia Populár 2024 ho tema “identidade, rezisténsia, rezilensia”, ne’ebé organiza husi Centro Nacional Chega!I.P parseria ho Homan Art Production, durante loron 3 (18-20), iha Casa Europea no Largo Lesidere-Dili la’o ho susesu.
Nune’e, iha diskursu enseramentu Festivál refere, Diretór Ezekutivu Centro Nacional Chega!I.P, Hugo Maria Fernandes, lori naran pesoal no instituisaun Centro Chega! nian hato’o parabens ba komunidade arte liu-liu Koodenadór Homan Art Production, Etson Arintes da Costa Caminha ba susesu realizasaun Festivál Kultura Rezisténsia Populár 2024.
“Pesoalmente ho mos lori CNC nia naran hau hakarak hato’o ami nia orgullu boot lahalimar ba partisipasaun komunidade arte sira komesa husi abertura to’o ohin kalan ne’ebé mak mai hatudu imi nia obra artistiku sira”, dehan Hugo iha diskursu enseramentu Festivál, iha Jardin Largo Lesidere, Sexta-feira, (20 Dezembru 2024).
Ohin kalan ita asiste afirmasaun ita nian kona-ba ita nia identidade. Ita orgullu tanba ita nia identidade Kultura, ita nia identidade rezisténsia. “Hau sente katak ema Timor labele sente ofendidu labele sente laran moras ou laran kanek tanba sa mak ita halo durante kalan 3 ida ne’e, fo sentidu duni ba ita nia identidade”.
Aprezentasaun sira durante loron 3 komesa husi loron 18, 19 no 20 fo sentidu no signifikansia boot ba ita nia identidade Kultura. Ida ne’e refleta ba ita nia luta kontra kolonializmu sira to’o iha ita nia luta kontra okupasaun. Identidade ida ne’e mak ita lori no hakerek iha konstituisaun RDTL.
Entaun, mensajen sira ne’ebé hato’o liu husi teatru, liu husi poezia, liu husi muzika sira ne’e kontinua fo marka ida katak ita valoriza duni. Identidade Kultura ida ne’e mak ita uza hodi luta ba ita nia ukun rasik-an. Luta ne’ebé mak ita halo la’os de’it husi frente 3 hanesan, frente armada, frente diplomasia no frente klandestina, maibé ita nia luta kontribuisaun mos husi komunidade arte no artista sira. Tanba ne’e, liu husi Festivál ida ne’e ita atu fo valor no fo dignifikasaun ba sira.
Ho sentidu ida ne’e mak Centro Chega! inisia Festivál Kultura Rezisténsia Populár atu kontinua husi jerasaun ba jerasaun. Kultura ida ne’e, identidade ida ne’e, ita kuda metin iha ita nia ran, ita nia neon, ita nia fuan no ita nia klamar.
“Ba Centro Nacional Chega! ami hakarak hato’o ami nia apresiasaun ida ne’ebé a’as lahalimar ba Edson husi Homan Art Production. Hau hanoin performance sira ne’ebé mak hatudu iha dia 18, 19, 20 hatudu buat di’ak. Ita nia komunidade arte, ita nia artista sira bele halo eventu ne’e hau bele hateten katak ho sentidu ida bele internasional. Parabens ba Edson ho kolega sira hotu ne’ebé mak halibur iha Homan Art Production ba imi nia talenta, ba imi nia kreatividade”, Diretór parabeniza.
Hugo reforsa, “Hau mos hakarak lori CNC nia naran hateten katak, tinan oin CNC sei kontinua parseria ho Homan Art Production. Ikus liu hato’o boas festa santo naral no feliz ano novo tinan 2025 ba hotu-hotu”.
Iha oportunidade hanesan, Sekretáriu Estadu Arte no Kultura (SEAK), Jorge Soares Cristovão hato’o apresiasaun ba Centro Chega!I.P ba inisiativa ne’ebé di’ak hodi realiza Festivál Kultura Rezisténsia Populár 2024.
Festivál ida ne’e hatudu ita nia vontade ba papel no kontribuisaun luta artista sira liu husi arte no muzika sira. Artista sira nia kontribuisaun importante iha prosesu luta ba ukun rasik-an. Festivál ida ne’e hanesan mos espasu ida atu halibur nafatin artista sira hodi espresa sira nia talentu.
SEAK apresia ba vontade artista hotu ne’ebé mak kolabora i partisipa Festivál Kultura Rezisténsia Populár 2024 durante loron 3 nia laran. “Mai ita hamutuk atu haburas ita nia identidade Kultura promove liu husi espresaun talentu arte no Kultura ne’ebé iha”.
Iha biban ida ne’e hakarak enkoraza nafatin liu-liu ba foinsa’e sira ne’ebé mak iha talentu. Espresa nafatin imi nia talentu. Hanesan governu ita laiha buat barak, maibé iha aprezentasaun ruma imi presiza tulun ita bele ko’alia ba malu para oinsa husi parte SEAK bele haree buat ne’ebé mak bele apoiu tuir kbiit ne’ebé mak governu iha.
Jenia Filomena Lobo nu’udar Grupu Hakbiit ne’ebé partisipa iha Festivál ne’e espresa sentimentu kontente tanba bele aprende oinsa promove arte, Kultura no identidade.
Liu husi atividade ne’e ami bele hatene kona-ba Kultura. Hau sente atividade ne’e kapas tanba iha iha atividade Festivál Kultura, maibé fo mos oportunidade ba joven sira ne’ebé faan produtu sira no oportunidade ba joven sira hodi kontinua promove abilidade emprendedorizmu.
“Buat ne’ebé aprende iha Festivál ne’e mak atu promove ita nia Kultura no identidade. Hau nia mensajen ba joven sira katak, mesmu ita iha ábitu ho dizitalizasaun, maibe liu husi Festivál ne’e bele aprende kona-ba ita nia Kultura tanba Kultura mak ita nia identidade nasional”, nia esplika.
Tuir dadus, ema sira ne’ebé halo tanto durante Festivál Kultura Rezisténsia Populár hamutuk 25 kompostu husi tato tradisional, tato rakitan no tato modernu. Tuir observasaun Media Chega! iha terreñu nota katak atividade Festivál durante loron 3 hetan seguransa husi PNTL no atividade la’o ho di’ak.
(Media CNC)
