Jakarta – (31 Agustu 2023), Organizasaun Sosiedade Sivil Kontras Sulawesi identifika labarik lakon na’in 86 ne’ebé militar Indonézia lori ba Indonézia liu-liu iha Provinsia Sulawesi oras ne’e sira infrenta problema barak.
Koodenadór Organizasaun Sosiedade Sivil Kontras Sulawesi, Dimas Bagus Arya hatete, Kontras Sulawesi hanesan organizasaun sosiedade sivil durante ne’e halo identifikasaun ba labarik lakon iha Provisia Sulawesi.
Labarik lakon hirak ne’e agora halo servisu domestiku hanesan hein ema nia karau, balun servisu hanesan TBO (Tenaga Bantuan Operasional) ba familia no balun laiha uma no hela de’it iha uma kos.
Durante tinan barak, nia haktuir, labarik lakon sira hela iha Sulawesi, sira muda ona sira nia identidade sai ona Warga Negara Indonézia (WNI) no muda mos sira relijiaun Katolika ba Musulumanu. Problema ida iha Sulawesi mak Feto sira nunka sai ba liur sira sempre iha de’it uma laran.
“Identifika ona 86 labarik lakon husi Timor-Leste, mane 74 no feto 12, ne’ebé hela iha sidade 25 iha Propinsi Sulawesi,” Koodenadór Kontras Sulawesi hato’o asuntu ne’e iha konferensia ne’ebé organiza husi Centro Nacional Chega!I.P no Komisi Nasional Hak Asasi Manusia Republik Indonesia (KomNas HAM RI), ne’ebé realiza iha ótel Heritage Jakarta-Indonézia.
Nia esplika, Provinsia Sulawesi, Suku Makati agora dadaun sai fatin refujiadu ba labarik lakon sira ne’ebé uluk militar Indonézia lori durante invasaun Indonézia iha Timor-Leste husi 1975-1999.
Ketua Ikatan Keluarga Orang Hilang Indonesia (IKOHI), Zaenal Muttaqin informa, labarik lakon iha Indonézia kontribui ba numeru kiak no dezempregu iha Indonézia tanba barak mak laservisu tanba laeskola.
Nia reforsa, labarik lakon iha Indonézia balun sai tukan parkir iha Tanah Abang. Wainhira mosu desputa kona-ba fatin parkiran, baku malu, polisia kaer kaer nia halo investigasaun, nia laheten ko’alia tanba laeskola. Entaun polisia kastigu nia.
Ho problema ne’e, Ketua IKOHI konsidera programa reunifikasaun labarik lakon ho familia ne’e di’ak no importante.
“Labarik lakon sira Timor-Leste kontribui ba presentazen kiak iha rai Indonézia,” dehan Ketua IKOHI iha konferensia.
Wakil Ketua Komnas HAM, Abdul Haris Semendawai argumenta, programa reunifikasaun labarik lakon ne’e importante no presiza atu kontinua, maibé presiza halo idetifikasaun labarik lakon ne’ebé hasoru problema oinsa, fasilita prosesu reunifikasaun no fasilita mos kestaun ekonomia.
Media Chega!.
