Dili – Ekipa husi Centro Nacional Chega!I.P liu husi Divizaun Solidariedade ba Sobrevivente (DSS) no Organizasaun Lokál Empreza Di’ak iha Tersa-feira (03/05/2022) hahú ona enkontru no diskusaun kona-na Formasaun Negosiu Ki’ik ne’ebé sei fó ba Sobrevivente sira. Enkontru ne’e hala’o iha Salaun Konferénsia Centro Chega!, Antigo Comarca Balide- Dili.
Diretór Divizaun Solidariedade ba Sobrevivente Nelson Seixas Miranda hateten, iha tinan 2018 Centro Chega! hahú konkretiza servisu sira ne’ebé liga ho sobrevivente ka vítima funu sira ne’ebé sei moris vuneravel liu, hodi konsentra ba implementa Rekomendasaun liga ho Reparasaun ne’ebé faz parte iha Rekomendasaun Chega! 204 no rekomendasaun sira ne’e liga mós oinsá atu fasilita no kapasita sobrevivente sira ho fomasaun kona-ba negosiu kiik.
Iha tinan ida ne’e, Centro Chega! hakarak halo parseria ho Organizasaun Lokál Empreza Di’ak ne’ebé bele fasilita Formasaun Negosiu Ki’ik ba Sobrevivente sira ne’ebé ho intensaun atu kontribui ba sobrevivente sira hasa’e sira nia kapasidade no mos sai nu’udar rekoperasaun ba Trauma Healing ne’ebé sira sofre iha tempu funu nian.
Entretantu, Diretora Empreza Di’ak Joana da Costa Gusmão hateten, Empreza di’ak iha ona esperiénsia hahú kedas tinan 2012 no prontu servisu hamutuk ho Centro Chega! atu fó formasaun ba Sobrevivente sira hodi hasa’e sira nia kapasidade ba negosius ne’ebé sustentavel nafatin no prontu halo monitorizasaun ba sobrevivente sira ne’ebé halo ona negosiu, nune’e bele kontinua la’o ba oin.
Durante enkontru ne’e, parte rua mós ko’alia kona-ba Standard Operational Procedure (SOP) husi Centro Chega! nian ba Empreza Di’ak ne’ebé sei sai hanesan parseiru atu halo formasaun ba Sobrevivente sira.
Media Centro Chega!
