Dili – Responsavel Kongregasaun Relijious de Jesus no Maria (RJM) Kasait-Liquiça, Madre. Selma D’ Souza kongratula Centro Nacional Chega!I.P tanba fó ona livru Audénsia Públiku, Hatutan Memória Volume 1 no 2 nomós Relatóriu CAVR no PMAS ba sira.
Madre. Selma haktuir, Centro Chega! iha genorisidade (generosity) boot tebes tanba entrega livru barak no livru ne’e sei rai iha mini biblioteka eskola atu bele ajuda estudante sira estuda hodi aumenta sira nia koñesimentu kona-ba istória pasadu ba ukun rasik-an nian.
“Hau sente kontente no orgaullu tebes ba imi (Centro Chega!) nia genoridade tanba fó livru barak hanesna ne’e. Livru ne’e, bele ajuda ami nia estudante sira iha Casait. Livru ne’e, ami sei rai iha ami nia biblioteka kiik, ami hakarak haburas livru oin-oin kona-ba Timor nian”, dehan Responsavel RJM ba Media Chega! Antigu Comarca Balide-Dili, Kuarta-feira (07/04/2022).
Antes ne’e, iha loron Segunda-feira, 14 Marsu 2022, Irmãs husi Kongregasaun Relijious de Jesus no Maria (RJM) Kasait-Liquiça hamutuk ho Irmã sira ema na’in 20 hala’o uluk vizita mai iha Centro Chega! hodi haree ezibizaun istóriku sira kona-ba CAVR, prizoneiru politiku, Direitus Umanus, sala arkivu no Sela nakukun (fatin Comarca).
Centro Nacional Chega!I.P, Da Memória à Esperança (Centro Chega!) hamri’ik nu’udar institutu públiku ida ne’ebé estabelese ho dekretu Lei no. 48/2016 no tutela direitamente ba Primeiru Ministru. Centro Chega! nia vizaun mak: “Sosiedade ida ne’ebé inkluzivu, la repete istória passadu nian, moris iha dame, no respeitu ba direitus umanu”. Centro Chega! nia misaun mak: “Harii sentru Pós-konflitu ne’ebé prezerva memória passadu nian hodi promove direitus no valór umanu, harii parseria nasionál no internasionál hodi reforsa rede servisu sira atu implementa rekomendasaun sira husi Relatóriu Final Comissão de Acolhimento, Verdade e Reconciliação (CAVR)-Chega! No Comissão da Verdade e Amizade (CVA) – Per Memoriam Ad Spem, sira ne’ebé relevante”.
Media Chega!
