Dili – Centro Nacional Chega!I.P, lidera husi Diretór Divizaun Edukasaun no Formasaun (DEF), Vicente Borges Maia akompaña husi espesialista kurikulum Ensinu Sekundária no ofisiál sira halo enkontru ho Prezidente no Vise Prezidente INFORDEPE ho ekipa elaboradór no formadór sira.
Diretór DEF, Vicente Borges Maia informa, objetivu enkontru ne’e ko’alia kona-ba kooperasaun servisu Centro Chega! ho INFORDEPE (Instituto Nacional de Formação de Docentes e Profissionais da Educação de Timor-Leste) kona-ba elaborasaun manuál formasaun siénsia sosiais ba profesor sira ho konteúdu Chega!.
Vicente haktuir, elaborasaun manual formasaun ne’e foka kona-ba istória Timor-Leste no direitus umanus ba Ensinu Baziku 20 Ciclo – ba Kintu Ano no Sextu Ano, ba 30 Ciclo – ba Setimu Ano to’o Nonu Ano no Ensinu Sekundaria ba Deximu Ano no Desimu Segundu Ano.
Elaborasaun manual formasaun ne’e halo bazeia planu no programa Centro Chega! nian tinan 2022. Bazeia mós ba programa KOICA (The Korea International Cooperation Agency) nian ba apoiu programa Centro Chega! no Ministériu Edukasaun Juventude no Desportu (MEJD).
“Agora ita ko’alia ne’e kona-ba asuntu tékniku eleborasaun materia ba iha 20 Ciclo, 30 Ciclo no Ensinu Sekundariu”, esplika Diretór iha sala enkontru, Segunda-feira (07/03/2022), Balide-Dili.
Atu fó hanoin de’it katak, iha tinan 2018, Centro Chega! asina ona nota entendimentu ka MoU (Memorandum of Undestanding) ho Minisériu Edukasaun Juventude no Desportu (MEJD) oinsá atu integra Relatóriu Chega! liu-liu materia istória no direitus umanus ba iha kurikulum edukasaun.
Prezidente INFORDEPE, Manuel Gomes apresia servisu Centro Chega! ba kooperasaun servisu hamutuk ho INFORDEPE atu halo elaborasaun manuál formasaun siénsia sosiál ba profesór sira ho konteúdu Chega!.
Nia haktuir, elaborasaun manuál formasaun siénsia sosiais ba profesor sira importante tebes atu bele ajuda profesor uza hodi hanorin estudante sira husi ensinu baziku 20 Ciclo, ba Kintu Ano no Sextu Ano. Ba 30 Ciclo, ba setimu Ano to’o Nonu Ano no Ensinu Sekundaria, ba Deximu Ano no Desimu Segundu Ano.
“Antes atu fó formasaun ba professor sira tenke iha duni manuál no manuál ne’e mós lases husi konteúdu kurikulares ne’ebé estabelese ona tantu istória no Direitus Umanus”, Prezidente INFORDEPE afirma.
INFORDEPE iha rekursu umanus ne’ebé sufisiente atu apoiu Centro Chega! ba elaborasaun materia siénsia sosiais liu-liu istória no direitus umanus
“Ami nia formadór sira ne’e fó apoiu para elaborasaun materia sira ne’e hodi sai nu’udar manuál ba formasaun. Formadór sira ne’e mai husi área direius umanus no Istória”, Prezidente INFORDEPE garante.
Rezultadu enkontru ne’e parte rua deside ona hodi kria ekipa hodi halo koordenasaun servisu ba implementasaun atividade.
Media Chega!
