Dili- iha loron Segunda-feira, (10/01/2022), Diretór Ezekutivu Centro Nacional Chega!I.P, Hugo Maria Fernandes halo enkontru kortejia ho Embaixadór foun Indonézia iha Timor-Leste, Okto Dorinus Manik hodi deskute kona-ba kooperasaun servisu.
Iha enkontru ne’e, Diretór Ezekutivu introdúz kona-ba Relatóriu CAVR-Chega! no CVA no mos papél Centro Chega!, mandatu no tarefa servisu. Esplika mos kona-ba servisu Centro Chega! nian iha asuntu edukasaun, solidariedade sobrevivente no asuntu kooperasaun servisu ho instituisaun sira iha rai laran no mos rai liur, servisu arkivu no mos asuntu rekonsiliasaun mak durante ne’e Centro Chega! halo ona, no mos husu ba Embaixador foun Indonézia iha Timor-Leste atu hametin kooperasaun.
Embaixadór Indonézia iha Timor-Leste, Okto Dorinus Manik agradese Centro Chega! no prontu hametin kooperasaun no koodenasaun servisu ba implementa rekomendasaun sira husi Relatóriu Final Comissão de Acolhimento, Verdade e Reconciliação (CAVR)-Chega! No Comissão da Verdade e Amizade (CVA) – Per Memoriam Ad Spem, sira ne’ebé relevante.
Enkontru ne’e hala’o iha Restaurante Aru Backry Pantai Kelapa Dili, iha ambitu serimonia resepsaun ne’ebé oferese husi Embaixadór foun Indonézia iha Timor-Leste ho ekipa.
Enkuantu, Centro Nacional Chega!I.P, Da Memória À Esperança (Centro Chega!) hamri’ik nu’udar institutu públiku ida ne’ebé estabelese ho dekretu Lei no. 48/2016 no tutela direitamente ba Primeiru Ministru. Centro Chega! nia vizaun mak: “Sosiedade ida ne’ebé inkluzivu, la repete istória passadu nian, moris iha dame, no respeitu ba direitus umanu”. Centro Chega! nia misaun mak: “Harii sentru Pós-konflitu ne’ebé prezerva memória passadu nian hodi promove direitus no valór umanu, harii parseria nasionál no internasionál hodi reforsa rede servisu sira atu implementa rekomendasaun sira husi Relatóriu Final Comissão de Acolhimento, Verdade e Reconciliação (CAVR)-Chega! No Comissão da Verdade e Amizade (CVA) – Per Memoriam Ad Spem, sira ne’ebé relevante”.
Media Chega!
