Dili, 13 Agostu 2020 – Centro Nacional Chega!I.P (Centro Chega!) ho Fundasaun Mahein (FM) asina ona Nota Entedimentu atu halo monitorizasaun ba implementasaun Rekomendasaun Chega! no CVA iha área Seguransa no Defeza. Selebrasaun Nota Entedimentu ne’e hala’o iha Salaun Konferénsia Centro Chega! iha Antigo Comaraca Balide – Dili.
Diretór Ezekutivu Centro Chega! Hugo M. Fernandes hateten katak, objetivu husi servisu kooperasaun ne’e importante tebes, oinsá atu hatúr no materializa Rekomendasaun Chega! no CVA iha polítika reforma institusional hodi hakbiit kapasadidade ba membru F-FDTL no PNTL sira. FALINTIL-FDTL no PNTL nu’udar Instituisaun Estadu ida ne’ebé mak sai lutu ba ninia sidadaun sira atu nune’e bele sente hakmatek no seguru. Iha rekomendansaun Chega! ne’e hateten katak, oinsá halo reforma instituisaun governu nian. Ezemplu, iha istória pasadu ‘Funu Maun-Alin’ akontese bainhira Forsa Armada halo violénsia hasoru sidadaun sira.
Hafoin mai to’o iha okupasaun Indonézia mos hahalok ne’e kontinua repete, liu-liu TNI ho POLRI sira mós komete krime oin-oin hanesan prátika violasaun direitus umanus ba ema Timoroan sira ne’ebé mak hakarak hili ukun-an. Iha periudu ukun-an ida-ne’e, tuir loloos F-FDTL, PNTL no INTELIJENSIA sira labele repete hahalok brutalizmu TNI ho POLRI sira nia atitude, no tenke respeitu sidadaun sira no halo atuasaun loloos tuir polítika, lei ho regulamentu ne’ebe vigór.
Iha biban ne’e mós, Diretor Ezekutivu Fundasaun Mahein Sr. João Almeida hateten, partikularmente fó agradese tebes ba Centro Chega! nu’udar Instituisaun Públiku ida-ne’ebe mak fó fiar no koopera hodi halo servisu monitorizasaun liu-liu iha setór Seguransa no Defeza nian ba mandatu tinan tolu.
