Lautem – Iha loron 8 Agostu 2020, Centro Nacional Chega! hamutuk ho Asosiasaun Vítima no Komunidade Suku Mehara, Postu Admnistrativu Tutuala, Munisípiu Lautem komemora tinan 37 levantamentu armada ne’ebé akontese iha loron 8 Agostu 1983. Komemorasaun ne’e realiza hodi hanoin hikas fali akontesimentu sira hafoin Levantamentu Armada iha Suku Mehara.

Komemorasaun ne’e hahú uluk ho semináriu ne’ebé hala’o iha loron 7 Agostu 2020 iha Sede Suku Mehara. Iha semináriu ne’e, Reprezentante Diretór Ezekutivu Centro Nacional Chega! Sr. Aventino Ximenes aprezenta Papel Centro Nacional Chega! hodi tau matan ba konservasaun memória pasadu no hato’o katak komemorasaun ba eventu Istóriku nu’udar valorizasaun no onra ba martires sira.

Sr. Aventinu hatutan, ho komemorasaun ne’e  bele hamosu espiritu nasionalizmu ba jerasaun foun sira hodi kontribui ba konstrusaun Estadu.

Iha oportunidade hanesan, Komunidade Suku Mehara fó mós sira nia sasin ba hahalok violasaun kontra Direitus Umanus ne’ebé komete husi Militár Indonézia iha periodu Agostu 1983 to’o Janeiru 1984.

Komunidade sira haktuir katak hafoin leventamentu armada iha loron 8 Agostu 1983 ne’ebé lidera husi Liurai Miguel Dos Santos “CUBA”, Militár Indonézia ne’ebé kompostu husi Unidade Sater 515, Batallaun 641, Linud 100 no Kopassus halo retaliasaun iha Suku Mehara. Militar sira ka’er, halo tortura no oho populasaun sivíl ne’ebé deskonfia iha ligasaun ho levantamentu Armada.

Komemorasaun Levantamentu armada kontinua ho misa requem ba martire sira no remata ho karii ai-funan iha fatin oho no sunu saudozu Jorge Nascimento, Gaspar Nunes no José Manuel Inacio. Saudozu nain 3 (tolu) ne’e hetan oho no sunu husi Miitár Indonézia iha Seiara Aldeia Porlamano, Suku Mehara iha Outubru no Novembru hafoin levantamentu armada iha fulan Agostu 1983.