Balibo – Xefe Aldeia Vila, Suku Vila, Postu Administrativu Balibo, Munisipiu Bobonaro, Fernando de Carvalho hato’o agradesimentu ba oitavu Governu konstitusional, liuhusi Centro Nacional Chega!I.P tanba halo ona lansamentu fatuk dahuluk monumentu liberdade.
Xefe Aldeia esplika, monumentu liberdade ne’ebé Centro Chega! hamutuk ho Konsellu Imprensa (KI), Ministru Prezidensia Konsellu Ministru (MPKM), Fidelis Leite Magalhães, Vise Ministru Administrasaun Estatal (MAE), Lino de Jesus Torrezão no Prezidente Autoridade Munisipiu Bobonaro lansa ne’e importante.
Tinan-tinan familia vitima sira, dia 6 Novembru ho kareta no motor, gasta osan halo viajen husi Balibo ba tasi hodi kari aifunan iha tasi, tanba familia vitima barak mate to’o agora seidauk hatene nia paradeiru. Alende ne’e laiha mós monumentu ida ne’ebé simboliza ba sira ne’ebé mate.
Ho planu Centro Chega! nian ne’ebé halo ona lansamentu monumentu liberdade ne’e, Xefe Aldeia Vila hato’o sentimentu kontente no agradese ba Centro Chega! tanba bele ajuda ona sira harii monumentu liberdade hodi fasilita familia vitima karii aifunan iha fatin refere.
“Hau sente kontente, governu harii ona monumentu ne’e tanba tinan-tinan ami labele tun tasi ona, ami dia 6 tenke tau aifunan iha ne’e, se lae tinan-tinan kareta, motor halai tun ba tasi tau aifunan iha tasi, ami fó obrigado barak, estadu aseita ona,” dehan Fernando ba jornalista sira iha Balibo, Domingo (16/10/2022).
Nia realsa, maske monumentu liberdade ne’e fóin mak halo lansamentu fatuk dahuluk, maibé hanesan autoridade lokál prontu hamutuk ho familia vitima no Centro Chega! atu halais prosesu konstrusaun ne’e ho di’ak.
“Kontinuasaun konstrusaun monumentu liberdade, ami sei halo kobransa, tau osan hamutuk para ami mak fóti uluk raihenek, fóti uluk fatuk para servisu ne’e lalais, ami mós prontu tein fó ba sira ne’eb’e servisu,” Xefe aldeia haktuir.
Nia subliña, autoridade lokal, familia vitma sira prontu servisu hamutuk ho Centro Chega! ba konstrusaun monumentu liberdade ne’e tanba ida ne’e sorte ida ne’ebé Centro Chega! fó. Kona-ba halo tuir kultura, autoridade lokal hamutuk ho familia vitima prontu halo tuir.
Media Chega!
