Dili – (12 Janeiru 2023), Timoroan liu-liu joventude no estudante sira labele haluha, aprende imi nia istória pasadu luta ba ukun rasik-an tanba imi nia istória pasadu importante oinsá aprende atu labele repete tán iha futuru.

Kestaun ne’e hato’o hosi Asesor Militar Falintil Forsa Defeza Timor-Leste (F-FDTL), Mejor Guy Wono ba Media Chega! wainhira halo vizita mai iha Centro Chega! Antigo Comarca Balide-Dili, hamutuk ho Staf Embaixada Australia no Forsa Defeza Australia liu hosi programa DCP (Defence Cooperation Program) Australia nian iha Timor-Leste.

Nia haktuir, razaun sira hala’o vizita isóriku mai iha Antigo Comarca Balide-Dili atuál Centro Nacional Chega!I.P no vizita fatin istóriku seluk iha Munisipiu Díli tanba hakarak aprende imi nia istória pasadu no kontribui ba dezenvolvimentu nasionál.

Nune’e, durante vizita iha Antigo Comarca Balide, sira haree exibisaun dokumental, hahú hosi exibisaun kona-ba asuntu hamlaha, exibisaun kona-ba prizaun no prizoneiru politiku, exibisaun kona-ba akontesimentu 1974-1999, exibisaun kona-ba apoiu komunidade internasional, exibisaun kona-ba direitus umanus no vizita sela nakukun fatin detensaun no torturasaun.

Buat ne’ebé halo sira kontente hodi aprende istória pasadu mak, tinan 24 nia laran, povu Timor-Leste barak mate tanba hamlaha, laiha hahan, laiha bee moos, laiha tratamentu saúde no laiha direitus umanus.

“Ami sente orgullu, ami bele vizita fatin ne’e, ami aprende oituan kona-ba luta kontra forsa inimigu durante tempu barak,” dehan Asesor Militar F-FDTL ba Media Chega! iha Antigo Comarca Balide-Dili.

Wono nu’udar Asesor Militar iha F-FDTL,  apresia servisu Centro Chega! I.P tanba bele guide ona sira no fahe ona informasaun no aumenta ona sira nia koñesimentu kona-ba istória pasadu.

Tanba ne’e nia husu ba  joventude no estudante sira hotu tenke mai vizita Chega! hodi aprende kona-ba imi nia istória tanba imi nia istória importante oinsa mak aprende kona-ba direitus umanus no rekonsiliasaun.

Media Chega!