Centro Nacional Chega!I.P organiza ona kolókiu nasionál kona-ba Reparasaun Vítima 1974-1999 ho tema jerál “Memorializasaun Dalan Ba Dignifika Sobrevivente”, ne’ebé realiza iha salaun Konferénsia Centro Chega! Antigo Comarca Balide-Dili, loron 16 Jullu 2021.
Prezidente Konsellu Administrasaun Interinu Centro Chega! Pe. Juvito do Rego hateten, kolókiu nasionál ne’e realiza hodi komemora loron ezistensia Centro Chega! ba dala IV, ne’ebé estabelese iha loron 17 Jullu 2017. Alende ne’e, razaun prinsipál kolokiu nasional ko’alia kona-ba asuntu reparasaun ba sobrevivente 1974-1999 hanesan atensaun espesial ida ba sira tanba ho sira nia terus no susar mak ohin loron fila Timor-Leste sai nasaun ida livre no independente.
Pe. Juvito hateten, Timor ukun-an tinan 10 resin ona, maibé sobrevivente wain tebes mak seidauk hetan dignifikasaun ida digna hodi dignifika sira nia moris iha aspeitu oin-oin. Tanba ne’e, presiza duni dignifikasaun sobrevivente liu husi dalan reparasaun ba sira atu hetan rekoñesimentu husi estadu antes sira husik mundu ne’e.
Tanba ne’e, asaun sira ne’ebé militár sira uza hodi hasoru Timoroan hanesan tortura, oho, kastigu no halo violasaun seksuál nu’udar konsekuénsia funu ba ukun rasik-an hodi hakanek Timoroan sira hotu nia hanoin. Ho sofrementu ida ne’e husik hela mai ita hotu ho laran moras no mataben.
Nia subliña, atu implementa dignifikasaun ba sobrevivente liu husi dalan reparasaun, presiza esforsu husi entidade hotu-hotu nia kontribuisaun hodi fo sentidu ba sira nia moris no ba Timoroan sira.
Entertantu, Diretór Centro Nacional Chega!I.P, Sr. Hugo Maria Fernandes iha enseramentu atividade kolókiu nasionál ho esperansa hato’o katak, liu husi kolókiu nasionál ne’e ba futuru ministériu sira ne’ebé asina ona Akta Rezultadu Pareser husi Kolókiu bele sai asaun nasionál ba asuntu reparasaun hodi integra iha sira nia polítika.
Enkuantu, akta ne’e asina Diretór Centro Nacional Chega!I.P, Sr. Hugo Maria Fernandes, ho reprezentante husi MNEK, MSSI, MS, AJAR, Asosiasaun Vitima, ASSEPOL no ACbit.
