Mai ita hatene ema nian istória pasadu durante konflitu polítiku (1975-1999) liu husi Programa Hatutan Memória. Nune’e, iha publikasaun ida ne’e, ami fahe informasaun ba maluk sira kona-ba istória João dos Santos “Makikit”, moris iha loron 14 fulan-Marso 1953, iha Leorema, Bazartete, Munisípiu Likisá.
João konta tuir nia istória pasadu; Iha tinan 1974 to’o tinan 1975 partidu ida-idak buka ninia adeptu. Momentu ne’ebá kamarada Nicolau Lobato nia aman, Narcisio Lobato, nomeia ha’u nu’udar delegadu FRETILIN nian hodi fahe kartaun FRETILIN ba populasaun husi Aldeia Bukumera, Suku Leorema. Ha’u asume kargu ida-ne’e husi loron 20 fulan-Setembru tinan 1974 to’o iha golpe loron 11 fulan-Agostu 1975. Bainhira UDT hahú funu hasoru FRETILIN, ha’u ho ha’u-nia elementu sira mak halo vijilánsia ba dalan diresaun Dili-Ermera, liliu parte Motaharee nian.
Iha momentu ne’ebá ha’u kaptura elementu UDT nian hamutuk na’in 100. Ha’u haruka ba Comite Central FRETILIN nian iha Aileu. Iha loron 1 fulan-Janeiru tinan 1976, ha’u ho ha’u-nia família tomak halai hotu ba ai-laran. Iha tempu ne’ebá ami terus tebetebes, ema sempre duni ami sa’e foho tun foho, balun ne’ebé mate so’e hela de’it, ami hamlaha, han de’it mak maek no kumbili. Ami halai sai husi uma, ba to’o rai ida naran Samlete mak ami fahe malu. Kamarada Nicolau Lobato nia aman no avo sira halai ba diresaun lorosa’e nian no ha’u ho ha’u-nia kaben hamutuk ho ha’u-nia rian naran Feliz Amaral filafali hodi hamutuk fali ho kamarada Bel[1]seor, Liurai Bernardino Mau-Ubu ho nia oan sira, iha rai ida naran Goan-Lema.
Iha fatin ne’e ami halai natar no lere to’os hodi bele sustenta ami-nia moris. Besik tinan ida mak inimigu tama mai, ami halai ba ai-laran. Iha ailaran ami-nia ai-han hotu ona, ami komesa tunu de’it maek mak han hodi tahan ami-nia moris. Forsa sira mós ai-han laiha, sira tunu de’it tali akar nia isin han hodi halo funu. Ai[1]32 han sira ami halo tasak hotu iha kalan, tanba loron bandu labele sunu ahi tanba tauk inimigu sira deskobre ami-nia fatin. Tempu udan ami hotu-hotu no sasan sira mak ami lori bokon hotu. Susar tebetebes, balun ne’ebé labele tahan komesa mate. Se inimigu sira dook, entaun ami bele hakoi ho di’ak, maibé kuandu inimigu besik, ami soe hela de’it ami ba dadaun ona.
Iha tempu ne’ebá ha’u uza de’it rama no surik hodi defende ha’u-nia an no família iha tempu difisil nia laran to’o ramata. Iha loron 30 fulan-Outubro tinan 1979, militár Indonézia kaptu[1]ra ona ha’u ho hau-nia kaben, Maria Imaculada da Conceição, iha rai ida naran Kaixoru, área Hatulia, distritu Ermera nian. Militár lori ami ba to’o Maubara. To’o iha-ne’ebá ema haketak ha’u ho ha’u-nia kaben iha KORAMIL Maubara. Ema lori ha’u ba KODIM Likisá, to’o iha-ne’ebá ema husu diresaun, ha’u hateten loloos de’it katak ha’u ema suku Leorema nian.
Ha’u simu kedan tuku isin ida to’o monu ba rai, sira haruka hader, simu tan tuku isin ida, kona ha’u-nia ibun, ha’u monu tan, to’o ha’u-nia nehan rua monu. Hotu tiha sira lori ha’u ba hatama nafatin iha kadeia to’o loron 5 fulan-Dezembru ti[1]nan 1985. Ha’u-nia rian ida naran Germenino Amaral mak ba hasai ha’u husi kadeia, nia lori ha’u hamutuk ho ha’u-nia kaben, Maria da Imaculada Conceição, mai hela iha Ermera to’o agora.
Iha loron 30 fulan-Agostu 1999, ha’u ho ha’u-nia família tomak vota iha referendu. Vota hotu, ha’u ho ha’u-nia família evakua ba ai-laran hodi salva an husi milísia Darah Merah sira. Loron-loron ami duni malu iha mota Gleno, ha’u uza nafatin ha’u-nia rama. To’o loron 4 fulan-Setembru 1999, bainhira ami rona ona rezultadu katak ukun an mak manan. Mak ami foin filafali mai ami-nia uma.
Hakerek husi: Mazarela A. dos Santos, Estudante Ensino Secundario Imaculada Conceição-Ermera
