Sede Anteriór Polísia Militár Portugés/Caserna Palapaso mós konsidera nu’udar Sítiu Istóriku ida tanba bainhira lansa movimentu armada iha loron 11 Agostu 1975, UDT domina tiha fatin importante sira iha Dili inklui Kuartel Polísia Militár Portugés nian ne’ebé lokaliza iha Palapasu. Alende atu fornese arma ba membru UDT sira, fatin ne’e sai Kuartél UDT nian no sai Sentru detensaun UDT nian iha Dili. Hafoin lansa golpe membru UDT sira kaptura simpatizante, militante no lider Fretilin sira nian hodi ba deten iha fatin ne’ebé refere, inklui Membru Comite Central FRETILIN hanesan Vicente Reis Sahe, Guido Valadares, José Siqueira no mós Xanana Gusmão.
Métodu tortura ne’ebé akontese iha Sentru Detensaun ida ne’e mak, baku prizoineiru sira ho sintu to’o ran sai, tuku no tebe prizioneiru sira nia isin to’o ran inklui tiru mate prizioneiru sira, bandu prizioneiru sira atu ba sintina iha liur nune’e sira sentina de’it iha sela laran. Ema ne’ebé deten iha fatin ne’e kuaze 100 to’o 200. Periodu detensaun ba prizioneiru sira iha fatin ne’e la to’o fulan ida tanba FRETILIN halo insuresaun Jerál Armada no kontrola fali Dili iha loron 20 Agostu 1975 no husik hotu ema sira ne’ebé deten iha fatin ne’e.
