Militár Indonézia halo invazaun boot mai Dili iha dadeersan rai-hun mutin, iha Domingu, loron 7 Dezembru 1975, ró-ahi funu Indonézia nian tiru morteiru no kañaun durante oras ida nia laran, liu tiha ida ne’e forsa parakedista Indonézia nian semo tun mai Dili nia klaran no forsa mariñeiru Indonézia nian mós sadere ona no tun iha Kampung Alor (Dom Aleixo, Dili) iha Oeste sidade Dili nian. Forsa espesiál Indonézia nian Kopassandha fahe ba grupu tolu, hodi bele asegura área estratéjiku sira iha Dili.

Iha tuku 04:30 madrugada, mariñeiru Indonézia nian 400-resin ho tanke anfíbiu funu nian tama ona husi Kampung Alor. Antes rai-hun mutin iha loron 7 Dezembru, aviaun hamutuk sia (9) halo formasaun iha Ataúro nia leten, semo ba Oeste área Wetar nian no halo ataka mai Dili husi Leste. Iha dadeer tuku 5 : 45, forsa parakedista komesa hatún ona. Forsa parakedista sira tún iha Palasiu Governu nia sorin parte oeste, tuir dalan antigun José Maria Marques, maibé sira hasoru rezisténsia maka’as husi forsa Falintil-Fretilin sira, tanba iha área hirak ne’e mak iha postu Milisia Fretilin/Falintil. Tiru malu komesa manas iha fatin hirak ne’e entre Grupu Milisia Fretilin-Falintil sira ho Forsa Parakedista Indonézia nian liu-liu iha sede Cruz Vermelha Internasional nian.

Informasaun kompletu bele haree iha SEKUÉNSIA INVAZAUN INDONÉZIA HO NIA ALIADU SIRA MAI TIMOR LORO SA’E.

Referensia husi Relatoriu Chega!