Iha loron 28 fulan maiu tinan 1997, loron ida antes eleisaun Jerál Indonézia nian, kuaze tuku 10:00 kalan grupu juventude husi rede klandestina iha Dili ne’ebé kompostu husi ema na’in 15 halo atake ho aten brani tebes ba postu seguransa Brimob (Brigade Mobile) nian ne’ebé lokaliza iha Bairo Pite, Dili. Iha insidente ne’e grupu juventude klandestina sira hakanek membru polisia na’in 5 no hadau kilat ida maske ikus mai kilat ne’e soe tama fali ba baleta laran. Nain 5 husi grupu juventude sira ne’ebé halo atake ne’e polisi sira tiru mate kedan iha mumentu ne’e.
Hafoin akontesementu ne’e juventude na’in 10 ne’ebé involve iha atake ne’e konsege halai sai husi fatin akontesementu ne’e maibé ikus mai autoridade seguransa Indonézia konsege identifika no kaptura ema na’in 9 hodi detein iha sede Polda Dili no halo tortura ne’ebé kruel tebes ba sira durante fulan neen nia laran, meius trotura sira ne’ebé Polisia sira halo mak obriga sira hasai sira nia roupa no lori eletriku hodi xoke sira nia órgaun jenitais no hatama sira ba karon laran hodi tara.
Hafoin fulan ne’en detein iha sede Polda autoridade seguransa sira haruka fali ba detein iha sela nakukun iha prijaun Becora durante fulan ida, iha fatin ne’e mos sira kontinua hetan tortura husi seguransa prijaun sira ho meius ne’ebé hanesan iha sede POLDA Dili. Ema sira ne’ebé autoridade siguransa kaptura no halo tortura hafoin akontesementu ne’e mak; Francisco da Silva, Reinaldo Marcal, Adalio Barreto, Domingos Barros, Abeto Soares, Frederico Soares, João da Cunha, Egidio da Cunha, Francisco da Conceição, Romeo da Conceição no Mariano Soares inklui David Dias Ximenes ne’ebé la Involve iha asaltu ne’e maibé autoridade Indonézia nian deskonfia katak nia mak autór prinsipál ka kakutak ba insidente ne’e, nune’e mos ho ema sivíl sira seluk ne’e la involve iha asaltu ne’e.
