Dili – (09 Fevereiru 2023), Profesora Eskola Sekundaria Jerál Katolika Esternato Delta, Rubinia da Conceição Araujo husu (apela) ba estudante sira atu aprende istória pasadu kona-ba Timor-Leste.

Nia haktuir, estudante sira tenke aprende istória timor tanba ne’e importante tebes, maibé la’os atu hatene para baku malu no istori malu. Alunu sira atu konsiente oinsa valores importante sira ne’ebé sira nia beiala sira husik hanesan sofrementu dadur, torturasaun no sira seluk-tán.

“Hau hanoin katak estudante no joventude sira presiza aprende ita nia istória rasik, atu bele hatene ita nia identidade timorense. Se ita nia istória laiha, ita lakoinese ita nia identidade, hau ne’e se”, dehan Profesora ba Media Chega! iha Antigo Comarca Balide-Dili.

Nia argumenta, nia hanesan profesora sente ksolok tebes, mai tuir workshop ida ne’e. liu hosi workshop ne’e bele aumenta koñesimentu liu-liu koñesimentu kona-ba istória Timor-Leste nian. ida ne’e buat ida folin tebes ba sira no buat barak ne’ebé sira ladun hatene.

Ho konesimentu ne’ebé iha, profesora promete sei fahe esperensia ne’e ba estudante sira atu bele hatene.

“Iha hau nia eskola, kuandu hau ko’alia kona-ba istória alunu gosta tebes-tebes atu rona, liu-liu kona-ba istória Timor nian sira hakarak atu hatene, ne’ebé ba hau ne’e hau hakarak atu aprende liu-tán, atu bele lori labarik sira fó kontribuisaun boot liu ba paz iha ita nia rain timor-leste”, nia esplika.

“Hau nia mensajen ba estudante sira mak ne’e, sira banati tuir valores ida ne’ebé beiala sira husik hela, valor sira mak ne’e, sakrifisiu, perdaun no rekonsiliasaun sala karik buka atu hadia”, nia afirma.

Rekonsiliasaun ne’e katak ita rekoinese, ita hadia no mós ita fó perdaun ba ema seluk. Simu ema seluk nia hanoin nia hakarak ita tenke aseita maibé ho ulun malirin la’os defende idak-idak nian.

Media Chega!.